विज्ञापन रद्द यायेमाःगु छुं नं कारण मदु : सामान्य प्रशासन मन्त्री पण्डित
लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः
![](https://www.lahananews.com/sites/default/files/lalbabu%20pandit.jpg)
संघीय मामिला तथा सामान्य प्रशासनमन्त्री लालबाबु पण्डितं स्थानीय तगिमय् कर्मचारी भर्ना योत लोकसेवा आयोगं चायेकूगु विज्ञापन रद्द यायेमाःगु छुं नं कारण मदुगु दावी यानादीगु दु ।
थौं मंगलवाः येँय् ग्वसाः ग्वःगु साक्षात्कार ज्याझ्वलय् मन्त्री पण्डितं उकथं दावी यानादीगु खः । वय्कलं विज्ञापन रद्द यायेत ब्यूगु निर्देशनया औचित्य पुष्टि यायेत राज्य व्यवस्था नापं सुशासन समितियात हाथ्याः बियादीगु दु ।
मन्त्री पण्डितं बैधानिक, कानूनी व लोकसेवा आयोग ऐन, नापं उकिया मूल्य व मान्यताया लिधंसाय् विज्ञापन चायेकागु नं धयादिल । वय्कलं विज्ञापनया सम्बन्धय् संवैधानिक न्ह्यसः वःसा उकिया न्याय निरुपण यायेगु ज्या सर्वोच्च अदालतं याइगु नं धयादिल ।
म्हिगः सोमवाः संसदया राज्य व्यवस्था समितिं लोकसेवा आयोगया विज्ञापन रद्द यायेत उजं बीवं मन्त्री पण्डितं थुकथं हाथ्याः बियादीगु खः । लोकसेवा आयोगया पदाधिकारीं समितिया मुँज्याय् हे वयाः विज्ञापन चायकेगु क्वःछिना संवैधानिक व कानूनी व्यवस्थाकथं जूगु न्ह्यथंसां सुनुवाइ मजूगु नं पण्डितं धयादिल ।
प्रदेश लोकसेवा आयोग नीमस्वंनीगु इलय् स्थानीय तगिंया मागकथं संघीय लोकसेवा आयोगं कर्मचारी ल्यज्याया नितिं विज्ञापन चायेकेफइगु संवैधानिक व प्रावधान दुगु मन्त्री पण्डितया जिकीर खः ।
Categorized in राजनीति