वाट्फोर्डयात बुका म्यान्चेस्टर सिटी थाहाँवन प्रिमियर लिगया शीर्ष थासय्
थिंला पारु ११४२, मंसीर १९ आईतवाः
![](https://www.lahananews.com/sites/default/files/manu_12.jpg)
वाट्फोर्डयात बुका म्यान्चेस्टर सिटी इंग्लीश प्रिमियर लिग फुटबलया शीर्ष थासय् थ्यंगु दु ।
वंगु चान्हय् वाट्फोर्डया मैदानय् जूगु कासाय् म्यान सिटी ३गू–१गूया गोल अन्तरं त्यागु दु । उमिगु नितिं बर्नार्डो सिल्भां निगू गोल याःबलय् राहिम स्टर्लीङं छगू गोल याःगु खः ।
वाट्फोर्डया कुचो हर्नान्डेजं छगू गोल याःगु खः । कासा त्यागु लिसें म्यान्चेस्टर सिटी न्ह्यानाच्वंगु सिजनय् न्हापांखुसिइ लिग धलःया शीर्ष थासय् थ्यंगु दु ।
१५गू कासां सिटीया ३५गू ल्याः जुगु दु । उतिग्यंक कासां ३४गू ल्याः मुंकुगु लिभरपुल निगूगु थासय् थाहाँवंबलय् ३३गू ल्याः मुंकुगु चेल्सी ३गूगु थासय् कुहाँवंगु दु ।
वंगु चान्हय् लिभरपुलं वुल्भरह्याम्पटन वान्डरर्सयात १गू–०या गोल अन्तरं बुकुबलय् चेल्सीयात वेष्ट ह्याम युनाइटेडं ३गू–२गूया गोल अन्तरं लिउने लाकल ।
अथेहे न्युकासल युनाइटेडं बर्न्लेयात १गू–०या गोल अन्तरं बुकुबलय् साउथह्याम्पटन व ब्राइटनं १गू–१गू गोलया ज्वलिन्ज्वःलय् नुगः चिइमाल ।
Categorized in कासा