राष्ट्रिय एकता दिवसया बिरुद्ध किपुलिइ ज्याझ्वः
लहनान्युज | पोहेलागा दशमि ११३८ (जनवरी ११ २०१८)
![](https://www.lahananews.com/sites/default/files/IMG_20180111_133302.jpg)
राज्यं पृथ्वी नारायण शाहया बुदिंयात राष्ट्रिय एकता दिवसाय् रुपय् हनाच्वंगु अवस्थाय् नेवाः नापं आदिवासी जनजातितय्सं धाःसा उकिया काउन्टर कथं पृथ्वी नारायण शाहयात लुमंकाः थुकलं बिइगु ज्या याःगु दु । नेवाः प्रदेशय् आदिवासी जनजाति जागरण अभियान,
नेवाः जागरण मञ्च, नेपाः युथ अर्गनाइजेशनया संयोजनय् पुष २७ गते किपुलिइ पृथ्वीनारायण शाहया नामय् थुकलं बिइगु ज्या याःगु दु । येँया असनय् मुना सलंसः मोटर साइकल सहित स्वनिगःया थीथी लागाया नेवाः नापं आदिवासी जनजातित किपुलिइ मनेगु ज्या याःगु खः । विहिवाः किपूया नेवाःत धाःसा सुथ न्हापां पृथ्वी नारायण शाह किपुलिइ चुलुया दःगु ल्वहं दुगु लागा द्यःध्वाखाय् मुना जुलुस पिकाःगु खः ।
नेवाः प्रदेशय् आदिवासी जनजाति जागरण अभियानया संयोजनय् पिकाःगु जुलुस किपूया नयाँ बजार बसपार्कय् वना येँय् नं वःपिन्त लसकुस यायेगु ज्या याःगु खः । अनं लिपा नेवाः जागरण मञ्च, नेवाः प्रदेशय् आदिवासी जनजाति जागरण अभियान व नेपाः युथ अर्गनाइजेशनया संयोजनय् मंकाः जुलुस पिकया किपूया छ्याकः ल्वहं दुगु लागाय् थ्यंगु खः । छ्याकः ल्वहं दुगु लागाय् थ्यंकाः नेवाः प्रदेशय् आदिवासी जनजाति जागरण अभियानया अभियान्ता श्रीकृष्ण महर्जनं पृथ्वी नारयाण शाहया नामय् किपूमितय्सं न्हापांनिसें थुकलं बिइगु याना वयाच्वंगु खँ कनादिल ।
उगु ज्याझ्वलय् वय्कलं पृथ्वी नारायण शाह नं नेपाः एकीकरण याःगु मुखसे गोरखा राज्य जक विस्तार याःगु अले झंगः ल्हाना, युद्धया नियम अःखः किपूयात त्याके धुंकाः नं किपूमितय्गु न्हाय् म्हुतु तकं ध्यना अन्यायय् याःगुलिं पृथ्वीनारायण शाह बसन्तपुर दरवारय् च्वने धुंकूगु अवस्थाय् तकं पृथ्वी नारायाण शाह धाइम्ह छ्याकः ल्वहं थें थुकलं बिइत लायकम्ह खः धकाः पृथ्वी नारायणया नामय् थुकलं बिइगु ज्या याना वयाच्वंगु खँ कनादिल ।
उगु ज्याझ्वलय् नेवाः जागरण मञ्चया कजि सुजिप बज्राचार्यं पृथ्वी नारायण शाह धाइम्ह आदिवासी जनजाति, नेवाःतय् हत्यारा खः धयादिसें पृथ्वी नारायण शाहया नामय् एकता दिवस हनेगु धइगु आदिवासी जनजातिया अपमान याःगु खः धयादिल ।
वय्कलं तत्काल पृथ्वी जयन्तीया नामय् बिउगु सार्वजनिक विदा लित कायेमाः धकाः धयादिल । अथे हे आदिवासी जनजातिया अभियान्ता डा. कृष्ण भट्टचनं बस्तवय् नेपालय् अधिकारया नितिं आदिवासी जनजातिय्सं आन्दोलन याना वनेमाः धकाः धयादिल । अथे हे नेपाल आदिवासी जनजाति महासंघया छ्याञ्जे गोविन्द छन्त्यालं आदिवासी जनजातिया हत्यारा धाइम्ह पृथ्वी नारायण शाह खः धयादिसें गबले तक आदिवासी जनजातिया माग सम्वोधन जुइमखु अबले तक जनजातित सुंक च्वनीमखु धयादिल ।
![](http://www.lahananews.com/sites/default/files/pictures/1_9.jpg)
शाक्य सुरेनं चिनाखँ न्यंकादीगु उगु ज्याझ्वलय् नेवाः प्रदेशया नितिं आदिवासी जनजाति जागरण अभियान किपूया कजि अर्जुन महर्जन, नेपाः युथ अर्गजनाइजेशनया राजाराम तण्डुकार, सेभ नेपाः भ्यालिया सुरज महर्जनपिन्सं आः नेवाः नापं आदिवासी जनजातितय्गु भूमिया अधिकार, भाषिक अधिकारनिसें फुक्क कथंया अधिकारया नितिं युवात सक्रिय जुया वःगु दु धयादिल ।
उगु इलय् छ्याकः ल्वतय् मंकाः कथं थुकलं बिइगु ज्या याःगु खः । अनं लिपा सकलें किपूया बाघभैरव लागाय् वना पृथ्वी नारायण शाहलिसे युद्धया इलय् प्रयोग याःगु ल्वाभः देगलय् तयातःगु अवलोकन यायेगु ज्या याःगु खः । अले सकलें वना किपूया द्यःध्वाखा लागाय् च्वंगु पृथ्वी नारायण शाह चुलुया दःगु ल्वंयात किपूमितय्सं द्यः कथं पुजा याना वयाच्वंगुयात नं अवलोकन यायेगु ज्या याना क्वचायेकूगु खः ।