रत्नाकर महाविहारं सितिकं मोतियाविन्दुया अपरेसन याकल
बुखँ श्रोत : किशोर धुसः | तछलाथ्व पंचमी ११३७ (मे २९ २०१७)
![](https://www.lahananews.com/sites/default/files/mikha.jpg)
२५६१औं बुद्ध जयन्ती समारोह समिति, रत्नाकर महाविहार, हःखबहाःया ग्वसालय् जूगु मिखा शिविरय् मोतियाबिन्दुया अपरेशन यायेमाःगु खनेदुपिनिगु थौं अपरेशन क्वचाःगु दु ।
वंगु बैशाख ९ गते समारोह समितिया ग्वसालय् व मोतिशान्ति शाक्यया कजिसुइ जूगु मिखा शिविरय् मोतियाबिन्दुया अपरेसन यायेमाःगु खनेदुपिं ४९म्ह मध्ये ४६म्हेसिया अपरेशन थौं तिलगंगा आँखा अस्पतालय् याःगु खः ।
३म्हेसिया धाःसा सुगरया मात्रा थहांवनाच्वंगु खनेदयाः अपरेशन लिछ्याःगु खः । अपरेशन याःपिं सकलसित थौं हे छेँय् लिछ्वःगु दु ।
सकसिगु अपरेशन सितिकं हे याकूगु खः । उकिया नापं निगः बसया व्यवस्था यानाः समारोह समितिपाखें हे सकलसित अस्पतालतक्क यंकूगु खः ।
![](http://www.lahananews.com/sites/default/files/pictures/mikha2.jpg)
अस्पतालय् यंकेगु लिसें अस्पतालय् हि जाँच याकेगु अले सकतां भ्वं दयेकाः अपरेसन कोथाय् यंकेगु तक हे समारोह समितिपाखें भाला कयाः अपरेसन जूगु खः ।
थौं थुगु अपरेसनलिसें २५६१क्वःगु बुद्ध जयन्तीया लसताय् रत्नाकर महाविहार, हखबाहाःया ग्वसालय् न्ह्यानाच्वंगु ज्याझ्वःया दकले लिपांगु ज्याझ्वः नं थौं क्वचाल ।
Categorized in राष्ट्रिय