येँयाःया झ्वलय् कुमारी लिसें रथय् जात्रा यायेमाःम्ह सद्यः भैलःद्यः ह्यूगु दु । थौं कोहिति त्वालय् च्वंम्ह ४ दँया मचा कर्शनव शाक्ययात न्हूम्ह भैलःद्यः (भैरव) कथं प्रतिस्थापन याःगु दु ।

कीर्तिपुण्य महाविहारका शाक्य कुलपुत्र कर्शनवयात थौं परम्परा व विधि कथं सुथसिया ९ः०३ निसें ९ः१६ ताः ईया साइतय् न्हूम्ह भैरवकथं प्रतिस्थापन याःगु खः ।

ज्ञानुप शाक्य व मनिला शाक्यया काय् कर्शनवयात थौं तलेजुया मूल पुजारी उद्धव कर्माचार्यं विधि कथं पूजा यानाः भैलःद्यःया रुपं प्रतिस्थापन यानाद्यूगु खः ।

न्हूम्ह भैलःद्यः जूम्ह कर्शनव वइगु फागुन महिनाय् ४दँ पूवनेत्यंगु दु ।

शाक्य महाविहार संघया पहल १६ बहालय् ब्यूगु सुचंया लिधंसाय् ब्वति काःपिं शाक्य कुलपुत्रपाखें कर्शनव भैलःद्यः जुइत उपयुक्त खनेदयेधुंकाः वयकःयात चयन याःगु खः ।

थ्वयां न्ह्यः, ओमबहाःया रुजन शाक्य भैलःद्यः जुयाच्वनादीगु खः ।

म्हिगः तिनि हे येँयाःया मेम्ह सद्यः गणेशया रुपं पाछैगल्लीइ च्वंच्वनादीम्ह भाष्करदेव संस्कारित केशचन्द्र पारावर्त महाविहारया शाक्य कुलपुत्र रोदिन शाक्य प्रतिस्थापन याःगु खः ।

ई, परिस्थिती व उमेर हदया हुनिं पुलांपिं गनेद्यः व भैलःद्यःयात विदा बियाः न्हूपिं द्यःपिं प्रतिस्थापन यायेमाःगु संघं न्ह्यथंगु दु ।

Categorized in राष्ट्रिय