यूरो २०२० या उपाधि इटालीयात
लहनान्यूज | दिल्लाथ्व द्वितिया ११४१, असार २८ सोमबाः
![](https://www.lahananews.com/sites/default/files/45323213-9778363-image-a-179_1626041870315.jpg)
पेनाल्टी सुटआउटय् ईंग्ल्याण्डयात बुका इटालीं थुगुसीया १६गू संस्करणया युरोकप फुटबलया उपाधि त्याकूगु दु ।
आइतबाः चान्ह्य् जूगु फाइनल कासाय् इंग्ल्याण्डयात पेनाल्टी सुटआउटय् ३–२ गोलया अन्तरं इटालीं बूकुगु खः ।
इंग्ल्याण्डया लण्डनया वेम्बली स्टेडियमय् जूगु कासाया क्वछिनातगु ९०गू मिनेट व तंसा ईलय् १–१ गोलया ज्वलिंज्व जुसेंलि कासा पेनाल्टी सुटआउटय् थ्यंगु खः । गुकिइ इटालीं बाजी त्याकेत ताःलात ।
पेनाल्टीइ इटालीया डोमिनिको बेरार्डी, लियोनार्दाे बुनिची व फेडेरिको बेर्नाडेस्चीं गोल यात धाःसा आन्द्रे बेलोट्टी व जोर्गिन्हो गोल याये मफत ।
अथेहे इंग्ल्याण्डया ह्यारी केन व ह्यारी मग्वाएरं जक गोल याये फत धाःसा मार्कुस रासफोर्ड, जाडोन व साका बाकुयोया गोल इटलीया गोलकिपरं पनाबिल ।
थ्वयांन्ह्य कासाय् इंग्ल्याण्डं गोल याना न्ह्यने लाकूगु खः । कासाया निगूगु मिनेटय् हे लुकसं किएरन ट्रिपिएरया पासय् गोल याना इंग्ल्याण्डयात न्ह्यने लाकेता ताः लागू खः ।
तर कासाया ६७गू मिनेटय् इटालीया लियोनार्दाै बुनिचीं गोल याना कासायात १–१ गोलया ज्वलिंज्व यात । इटालीया थ्व निगूगु उपाधि खः थ्वयान्ह्यः सन् १९६८ य् युरोकप त्याकूगु खः ।