यलय् तालिमं महिला समूह उत्साहित
सुरज, लहनान्युज | बछलाथ्व तृतीया ११३९ (मे ७ २०१९)
ललितपुर महानगरपालिका, समाज कल्याण महाशाखां थीथी महिला समूहया नितिं न्ह्याकूगु छवाःया उद्घोषण व वक्तृत्व विकास तालिम क्वचाल । महिला समूहया पदाधिकारीपिनिगु नितिं नुगःखँ तयेगु व ज्याझ्वः दयेकेगु, न्ह्याकेगु नितिं अःपुइमा धकाः थुगु स्यनेज्याया ग्वसाः ग्वःगु खः । तालिम २०७६ वैशाख १६ गते सोमबारनिसें न्ह्याःगु खः ।
पत्रकार, ज्याझ्वः न्ह्याकामि सुरजवीर बज्राचार्यं बियादीगु प्रशिक्षणय् २३ म्हसिन कयादीगु खः । वयकलं न्वँवायेगु गुण जक मखःसे छगू ज्याझ्वः ताःलाक ग्वसाः ग्वयेगु बारे नं स्यनादीगु खः ।महाशाखाया प्रमुख बाबुराजा महर्जनया सभापतित्वय् जूगु समापन समारोहय् मूपाहाँं सामाजिक विकास समितिया दुजः व यल महानगरपालिका ५ वडाया अध्यक्ष विकासमान श्रेष्ठं ब्वतिकयादीपिन्सं माग याःगु एडभान्स कोर्स ग्वसाःया नितिं थःम्हं पहल यायेगु बचं बियादिल ।
दसिपौ लःल्हासें वयकलं छवाःया तालिमं ब्वति काःपिंके विकास जूगु गुण व आत्मविश्वासं थः अतिकं लयतायागु खँ कनादिल । ज्याझ्वलय् विशेष पाहाँकथं महाशाखाया महिला विकास कार्यक्रम अधिकृत ज्ञानीशोभा महर्जनया ब्वति दुगु खः ।तालिम काःगु पुचःपाखें पुचःया थकालिम्ह मयजु लक्ष्मी ब्यञ्जनकारं ग्वसाः खलः महाशाखा व स्यनामि बज्राचार्ययात दोहलपा देछासें हनादिल । तालिम कयादीम्ह नारी जागृति समूहया विष्णुमाया थापां लसकुस यानादीगु थुगु ज्याझ्वलय् सुभाय् न्वचु नं तालिम कयादीम्ह हाम्रो कुसुन्ती महिला समूहया उर्मिला सुवेदीं बियादीगु खः ।
ज्याझ्वलय् रत्नाकर उद्यमी महिला समूहया सहिना बज्राचार्य, दिब्यनगर महिला समूहया मथुरा सापकोटा डोटेल व देवनगर महिला समूहया गोमा खरेलं तालिमया अनुभव व उपलब्धिबारे कनादिल । वयकःपिन्सं तालिमं थःपिं अतिकं उत्साहित जुयागु धासें अझ यक्वः सयेकेगु, अभ्यास यायेगु मन दुगुलिं थःपिनिगु नितिं एडभान्स कोर्सया ग्वसाः ग्वयादीत महानगरपालिकायात इनाप यानादीगु खः ।
तालिमय् सानेपा हाइट महिला समूह, शान्तिविहार महिला समूह, दिब्यनगर महिला समूह, रत्नाकार उद्यमी महिला समूह, नारी जागृत्ति महिला समूह, दिदीबहिनी हात्तेमालो महिला समूह, कुसुन्ती महिला समूह, शंखमूल महिला समूह, देवनगर महिला समूह, पञ्चेश्वर महिला समूहपाखें पदाधिकारीपिन्सं ब्वति कयादीगु खः ।
