यलया ठेच्वया नवदुर्गा प्याखँ तजिक जुइगु
लहनान्युज | कौलाथ्व पंचमी ११३९ (अक्टुवर ३ २०१९)
पिदँ दँ लिपा हाकन न्ह्याःगु यलया ठेच्व च्वःगु नवदुर्गा प्याखँया जानकारी बिइगु लागि ग्वसाः ग्वःगु पत्रकार भेटघाट ज्याझ्वलय् पायो (खड्ग) जात्रानाप सम्बन्धित थी थी गुथिया गुथियार, पत्रकारपि नाप यल महानगरपालिका १६ या वडाध्यक्ष निर्मलरत्न शाक्य आ हाकन बालक्क न्ह्याइ धका थौं छगु पत्रकार सम्मेलनयाना जानकारी बियादिगुु दु ।
नेपाःया ख्वाःपा प्याखँ मध्ये यलया ठेच्वय् च्वःगु नवदुर्गा प्याखँ न छगु खँ धका धयादिगु खः । यलया लायकुलि लिच्छवीकालीन, मल्लकालीन व शाहकालीनया स्वगुगु जात्रा मध्ये यलया ठेच्वय् च्वःगु नवदुर्गा प्याखँ यलया हे पुलागु प्याखँ खः धका वडाध्यक्ष शाक्यं धयादिगु खः ।
थुथु प्याखँ लिच्छवीकालीन राजा मानदेवया इष्टदेवता मानमानेश्वरी देवी व मल्लकालिन तुलेजु भवानी देवीनाप सम्बन्धित खः धका धयादिसे थुगु प्याखँ लाय्कुया मूलचुकय् दँय् दसं मोहनिया चालं कुन्हि व कति पुन्हि प्यन्हु तका प्याखँ हुकेगुु परम्परा दु ।
थुगु प्याखँ वःगु नीप्यँ निसे बन्द जुयाच्वंगु खःसा नेवाः पत्रकार राष्ट्रिय दबू यल जिल्ला, यल सांस्कृतिक पर्व संरक्षण समिति, नवदुर्गा गुथियार, यल लाय्कुया मू छे, आगः छेँया पुजारी, यल महानगरपालिका पिनिगु कुतलं हाकन न्ह्याकुगु खः ।
पट्को त्वालय् वःगु पीदँ निसे बन्द जुयाच्वंग थुगु प्याखँ थुगुसी मोहनि निसे न्ह्याइ धका वडा अधक्ष्य शाक्यं जानकारी बियादिगु खः । जात्रा न्ह्याकेगु लागि नवदुर्गा गुथियार, पट्को टोल सुधार समिति व यल महानगरपालिका १६ वडा ज्याकु नाप त्रिपक्ष निर्णय जुगु खः ।
थुगु दँय् वडा कार्यालय पाखे पूजा ज्वःलं व बली बिइगु खःसा मेगु दँनिसे पूजा ज्वःलं व बलीया लागि माःगु ध्यवा महानगरं दरबन्दीया ब्यवस्था यायेगु क्वछिगु खः ।