म्ये कासाय् १ लख सिरपाः
लहनान्यूज सम्वाददाता | ञलागा द्वादशि, ११३६ (सेप्टेम्बर २७, २०१६)
हलिं नेवाः दबू, नेपाः देय् मू कवःया ग्वसालय् जुइत्यंगु म्ये कासाय् १ लख तका सिरपाः बीगु जूगु दु ।
दबू, नेपाः कवलं येँय् छगू पत्रकार सम्मेलन यासें वइगु पुष १८ गते हलिंन्यंकया नेपाःमिपिनि दथुइ नेवाः म्ये कासा यायेगु जानकारी ब्यूगु खः । दबू, नेपाः कवःया छ्यान्जे रश्मिला प्रजापतिं कासाया न्हाप सिरपाः कथं ५०द्वः तका लिसें मुक्कं १ लख तका सिरपाः इनेगु जानकारी ब्यूगु खः ।
पत्रकार सम्मेलनय् ब्यूगु जानकारी कथं वइगु कार्तिक मसान्तया दुने दुतिंगु म्येया दथुइ निगू चरणय् ल्यज्या जुइ । ल्यज्याया न्हापांगु चरणय् मंसीर ४ गते नेपाःपाखें ब्वति काइपिं कासामिपिनि दथुइ ल्यज्या जुइसा नेपालं पिनेया कासामिपिनिगु अडिसन पुषया १० व ११ गते जुइ ।
कासाय् ब्वति कायेगु नितिं दुतिना फारम नं उगु हे पत्रकार सम्मेलनपाखें सार्वजनिक याःगु खः । हलिं नेवाः म्ये कासाया आधिकारीक फेसबुक पेजपाखें उगु फारम डाउनलोड याना कायेफइगु धाःगु दु ।
फारम अनलाइनया लिसें न्हिनसिया १ताः इलंनिसें ३ताः ईतक्कया दुने नेवाः देय् दबूया ज्याकुथिइ फारम दुतिनेफइगु नं धाःगु दु ।
- कासाय् नेवाः म्ये हालाः न्ह्याम्हेसिनं नं ब्वति कायेफइ
दबू, नेपाःया नायः पुष्कर माथेमां नेपालभाषाया संगीत ख्यलय् न्हूगु व उत्कृष्ट म्ये पितब्वयेगु लिसें सुलाच्वंगु प्रतिभायात दबूया विकास यायेगु तातुनां थुगु कासा जुइत्यंगु धयादिल । माथेमां हलिंया गुगु नं थासय् च्वनाच्वंपिं नेपाःमिपिन्सं नेवाः म्ये हालाः कासाय् ब्वति काय्फइगु धयादिल ।
कासाय् ब्वति कायेत म्ये धाःसा न्हूगु अले नेवाः हे जुइमाःगु नं माथेमां स्पष्ट यानाद्यूगु दु ।
कासाय् न्हाप, ल्यू, लियांल्यूया नापं बांलाःम्ह म्येच्वमि, लयचिनामिया सिरपाः नं बीगु जानकारी नं ब्यूगु दु ।
