मोहनि इलय् ख्वपय् तलेजु द्यःया थाय् बलि मबिइगु
लहानान्युज | अनलागा ५ ११४०,असोज २१ बुधवाः
थुगु दँय् मोहनि इलय् ख्वपय् तलेजु द्यःया थाय् बलि मबिइगु जूगु दु।
ख्वप नगरपालिकाया मेयर सुनिल प्रजापतिया अध्यक्षताय् च्वंगु जिल्ला प्रशासन कार्यालय व महानगरीय प्रहरी परिसरया प्रतिनिधि, गुठी संस्थान भक्तपुरया प्रमुख व तलेजुया पुजारी नाप च्वंगु बैठकं कोरोना महामारीया कारण तलेजुइ विधिपूर्वक पूजा यायेगु तर बलि धाःसा मबिइगु निर्णय याःगु दु।
ख्वपया तलेजुइ सर्वसाधारण बाहेक सरकारी स्तरया गुठी संस्थानं जक मोहनि इलय् ६० म्ह दुगुचा, ३१ म्ह म्येँय् व ३०म्ह हेँय् बलि बिइगु प्रचलन दु।
बैठकं मोहनिया इलय् थुगु दँय् ख्वपया तलेजु द्यःया थाय् दुने दक्को प्रकारया पूजाय् बलि मबिइगु व तलेजु द्यःया पूजा स्वास्थ्य सुरक्षा मापदण्ड व सामाजिक दूरी कायम याना विधिपूर्वक सामान्य जक यायेगु निर्णय याःगु दु।
अथेहे नरस्वां पिउगु दिं निसे कोजाग्रत पुन्हि तक नगरया थीथी शक्तिपीठय् जुइगु मेला, पूजा व नवरात्रया इलय् छु न किसिमया हुलमुल मयासे द्यःया मवनेत इनाप यायेर्गु निर्णय तक याःगु दु।
उगु बैठकं मोहनिया इलय् तलेजु द्यःया थाय् पूजा नाप सम्बन्धित बाहेक मेपिन्त प्रवेशय् रोक लगे यायेगु निर्णय याःगु दु। मेयर प्रजापतिं जात्रा व पर्वयात औपचारिकताय् जक सीमितयाना माने यायेगु निर्णयलय् जनताया ग्वाहालि दइगु बिश्वास याःगु दु।
Categorized in राष्ट्रिय
