मेलम्ची खानेपानी आयोजनाया भविष्य संकटय् लाःगु सरकारया स्वीकारोक्ति
दिल्लागा दशमी ११४१,साउन १९ मंगलबाः
प्रतिनिधिसभा अन्तर्गतया विकास तथा प्रविधि समितिं खुसि बाः वयाः मेलम्ची खानेपानी आयोजनाय् लाःगु क्षतियात अध्ययन यायेत सरकारया ध्यानाकर्षण याकूगु दु ।
सिंहरदरबारय्च्वंगु समितिया मुँज्यां आयोजनाय् लाःगु क्षतिया अध्ययन यायेत विज्ञतय्गु पुचः दयेकाः दीर्घकालीन समाधान ज्यंकेत सरकारयात निर्देशन ब्यूगु दु । खानेपानी आयोजना सञ्चालनया नितिं २१दँनिसें न्ह्यानाच्वंगु कुतः अले लगानी सुनिश्चित यायेत सिन्धुपाल्चोकया भौगर्भिक अवस्था अध्ययन यायेत विज्ञत दुथ्याःगु संरचना दयेकेत समितिं धागु दु ।
आयोजनाय् लाःगु क्षतिलिपाया पुनर्निर्माणया नितिं अन्तरमन्त्रालय समन्वय यायेत अले उकिया नितिं माःकथंया बजेट फ्यायेत न समितिं प्रधानमन्त्री व मन्त्रिपरिषद्या ज्याकूलिसे सरोकारवाला मन्त्रालयतय्त निर्देशन ब्यूगु दु ।
अथेहे याङ्ग्री व लार्के खुसिया लः मेलम्चीइ क्वफाये न्ह्यः अनया भौगर्भिक अवस्थाया विस्तृत अध्ययन यानाः प्रतिवेदन तयारी जूगु लिधंसाय् जक निगूगु चरणया ज्या न्ह्याकेत समितिं धागु दु । अथेहे मेलम्ची व हेलम्बु लागाय् खुसि बाः वयाः प्रभावित जूपिनिगु माःकथंया व्यवस्थापन, राहत व पुनस्र्थापना यायेत न समितिं सरकारयात निर्देशन ब्यूगु दु ।
मुँज्याय् समितिया दुजःपिन्सं विस्तृत अध्ययन मयाःसें आयोजनाया ज्या याःगु धासें सरकारप्रति तं प्वंकूगु खः । मुँज्याय् खानेपानी मन्त्रालयया छ्यान्जे अले उगु आयोजना विकास समितिया नायः प्रमिला देवी शाक्य बज्राचार्यं आयोजना स्वयां च्वयेया लागाया भौगोलिक अवस्थाबारे अध्ययन यायेत एडीबीयात पौ च्वयेधुंकूगु जानकारी बियादिल ।
वय्कलं आयोजनाया भविष्य हे संकटय् लाःगुलिं अन खनेदुगु समस्या ज्यंकेत सम्बन्धित फुक्क पक्षया ग्वहालि आवश्यक जुइगुलिइ बः बियादिल ।
Categorized in राष्ट्रिय
