मंसीर २ गते किजापुजाया दिं विदा बिइतः माग
लहानान्युज | कौलागा नवमी ११४०,कार्तिक २४ सोमवाः
![](https://www.lahananews.com/sites/default/files/k1_0.jpg)
नेपाल संवत् राष्ट्रिय न्हूदँ समारोह समिति ११४१ या नायः रमेश महर्जनया नेतृत्वय् शहरी विकासमन्त्री कृष्णगोपाल श्रेष्ठयात नाप लाःगु दु ।
थौं सोमवाः सुथय् मन्त्री निवासय् वय्कःयात नापलानाः समारोह समितिपाखें भिन्तुना देछाःगु खःसा लिसें कोरोना महामारीया हुनिं थुगु दँया न्हूदँ न्यायेकेगु सम्बन्धय् सहलह यायेगु ज्या जुगु दु।
समारोह समितिया नायः महर्जनं थुगुसीया न्हूदँ सामाजिक संजालपाखें हलिंन्यंकं थ्यं केगु नितिं थीथी कथंया तयारी जुयाच्वंगु खँ कनादीगु खः । लिसें वय्कलं समारोह समितिया ग्वसालय् स्वनिगःन्यंकं न्हूदँ न्यायेकेत नीस्वनातःगु समारोह समितिनाप मंकाः मुँज्या च्वनाः न्हूदँ कछलाथ्व पारु (मंसीर १ गते) न्यायेकेगु निर्णय जूगु व थ्वया लिपा मंकाः वक्तव्य पिथनेगु जानकारी नं
बियादिल ।
नायः महर्जनं नेवाःतसें मंसीर २ गते किजापुजा याइगु जूगुलिं उगु दिं सरकारपाखें सार्वजनिक विदा बिइमाःगु माग यानादीगु खः ।
अथेहे, दँय् दसंथें नेपाल सरकारपाखें न्हूदँयात कयाः यायेमाःगु ज्या सकतां यायेत नं इनाप यानादिल ।
शहरी विकासमन्त्री श्रेष्ठं कोरोना भाइरस संक्रमणया इलय् थुगु संक्रमणपाखें बचेजुयाः न्हूदँ न्यायेकेमाःगु खँय् बः बियादिसें थःपिन्सं मंसीर २ गते नेवाःतय् किजा पुजाया दिं लाःगुलिं थौं हे च्वनेगु मन्त्रिपरिषदया मुँज्याय् प्रस्ताव यंकेगु खँ कनादीगु दु ।
Categorized in राष्ट्रिय