मंगलबाः तक्क देययंक वाः वइगु
लहनान्यूज | गुंलागा सप्तमी ११४१, भाद्र १३ आईतवाः
छुं दिं थुखे देय्यंक वयाच्वंगु वाः थौं नं न्ह्याइगु मौसम पूर्वानुमान महाशाखां न्ह्यथंगु दु ।
आः मनसुनी वायुया न्यून चापीय रेखा नेपाःया तराई लागा लिक्कसं दूगुलिं देय्यंक सामान्यनिसें पूवंक बदली जुया वाः वयाच्वंगु नं महाशाखाया धापू दु । प्रदेश १, प्रदेश २, बागमती प्रदेश, गण्डकी प्रदेश व लुम्बिनी प्रदेशया अप्वः धैथें थासय् छुं भचा निसें मध्यम कथं वाः वयाच्वनिगु व थुगु झ्व थौं न्हिच्छिं जुइगु धाःगु दु ।
कर्णाली व सुदूरपश्चिम प्रदेशया छुं थासय् धाःसा नँ न्याना मलः जुइगु लिसें तच्वकं वाः वइगु संभावना दूगु नं न्ह्यथंगु दु । कन्हय् नं देय्यंक सामान्य निसें पूवंक बदली जुया आपालं थासय् वाः वइगु संभावना दूगु लिसें प्रदेश १, बाग्मती, गण्डकी व सुदूरपश्चिम प्रदेशया छगू निगू थासय् नँ न्याना मलः जुइगु लिसें तच्वकं वाः वइगु संभावना दु ।
सोमबाः निसें मौसमय् सुधार जुइगु जूसा नं मंगलबाः नं देय्या अप्वः धैथें थासय् छुं भचा निसें मध्यम कथं वाः वइगु लिसें प्रदेश १, बाग्मती, गण्डकी व सुदूरपश्चिम प्रदेशया छुं थासय् नँ न्याना मलः जुया वाः वइग्ु महाशाखां न्ह्यथंगु दु । मदिक्कया वांः पहाडी लागाय् भू–क्षय, चलः व गेग्रान बहावया जोखिम दूगुलिं खुसि व खहरे खुसिइ लःया सतह अप्वयेफइगु धका महाशाखाले सतर्कता नालेत धाःगु दु ।
उखे मदिक्कया वाःया हुनिं सोलुखुम्बुया लुक्ला विमानस्थलय् छवा निसें हवाई उडान ठप्प जूगु दु । मदिक्कया वाःया हुनिं लुक्लाय् ख्वातुक्क खसु न्यंगुलिं छुं नं विमानं उडान याये फूगु मदुनि । उडान बन्द जूबलय् लुक्ला लिसें जःखःया क्षेत्रय् तरकारी, सिसाबुसा, ला, ख्येँ लिसें मेमेगु न्हिंयान्हिथं छ्यलिगु ज्वलंया अभाव जूगु दु ।
नसा ज्वलंया मौज्दात माक्वः दूसा नं मेगु उपभोग्य ज्वलंया अभाव जुइगु न्ह्यागु खः । लुक्ला क्षेत्रय् तरकारी उत्पादन मजुइगु व सडक यातायातया पहुँच मथ्यंगुलिं ताजा तरकारी, ला, ख्येँ, सिसाबुसाया नितिं हवाई सेवाय् हे निर्भर जुइमाःगु दु । पर्यटकीय सिजन मजूसा नं फाट्टफुट्ट पर्यटक थ्यनाच्वंगुलिं उमित सेवा बिइत समस्या जूगु होटल व्यवसायीतयेसं धाःगु दु ।
उडान मजूबलय् ३० म्ह सिवें अप्वः यात्रु लुक्लाय् हे तक्यंगु नेपाल नागरिक उड्ययन ज्याकु लुक्लां न्ह्यथंगु दु ।
Categorized in राष्ट्रिय
