भाषाविद डा. कमलप्रकाश मल्ल मन्त
लहनान्युज | कछलाथ्व दशमी ११३८ (नोभेम्वर १८ २०१८)
भाषाविद्, त्रिभुवन विश्वविद्यालयया पुलांम्ह शिक्षाध्यक्ष प्राध्यापक डा. कमलप्रकाश मल्ल ८२ दँया उमेरय् शनिवाः बहनी मन्त । मदुम्ह मल्ल ताःई न्ह्यवनिसें पार्किन्सन ल्वचं कयाच्वंम्ह खःसा म्हिगः २३ः५३ बजे अमेरिकाया एटलान्टाय् मदुगु खः ।
निवाः न्ह्यव इन्द्रियतय्सं ज्या मयायेवं आइसियुलय् तयाः उपचार याःसां स्वास्थ्य सुधार मवयेवं वय्कःयात अन्तिम इलय् एटलान्टाया हे स्थानीय पिस हबय् यंकूगु खः । वय्कः अन हे मदुगु खः ।
मदम्ह मल्ल च्वसापासाया पुलांम्ह नायः न खः । नेपालभाषा व अंग्रेजीया यानाः निगू दर्जनं मल्याक सफू च्वयादीगु दु । वय्कः आशा सफूकुथि गुथिया पुलांम्ह दांभरि लिसें नेपालभाषा खँग्वःधुकू कमिटीया नायः व मू सम्पादक नं खः ।
ने.सं. १०५८ (वि.सं. १९९३) सालय् लक्ष्मीपुजा कुन्हु बूम्ह वय्कःया जहान, छम्ह म्ह्याय् व छम्ह काय दु ।
