भारतय् छन्हु हे ३८९०२म्हेसित कोरोना संक्रमित
लहनान्युज | दिल्लागा चतुर्दशी ११४०,श्रावण ४ आइतवाः
भारतय् वःगु २४ घण्टाय् कोरोना भाइरसं ३८ द्धः व ९०२ म्ह संक्रमित जूगु दु । भारतया स्वास्थ्य मन्त्रालयं बिःगु जानकारी कथं आःतक भारतय् कोरोना भाइरसपाखे संक्रमित जूपि १० लाख ७७ द्धः ६१८म्ह थ्यःगु दु ।
वःगु २४ घण्टाय् भारतय् कोरोना भाइरसया कारण ५४३म्ह सीगु दु । थ्व नाप भारतय् कोरोना भाइरसपाखे सीपिनिगु ल्याः २६ द्धः ८१६म्ह थ्यःगु दु ।
भारतया महाराष्ट्रय् जक कोरोना संक्रमितपि स्वगू लाख स्वया अप्व दये धुकुगु दु । तामिलनाडुइ छगू लाख ६५ द्धः स्वया अप्वसित कोरोना भाइरसं संक्रमण जूगु दु । दिल्ली छगू लाख २१ द्धः स्वया अप्पसित कोरोना संक्रमितपि पिहा वःगु दु ।
भारतय् आःतक छगू करोड ३७ लाख स्वया अप्वसित नमुना परीक्षण याये धुकुगु दु ।
अथेहे भारतय् आःतक ६ लाख ७७ द्धः व ४२३म्ह संक्रमितपि डिस्चार्ज जुया छेँय् वने धुकुगु दु ।
