भारतया बुकाः न्यूजिल्याण्ड विश्वकप क्रिकेटया फाइनलय्
लहनान्यूज | नेसं ११३९ दिल्लाथ्व नवमि (९ जुलाइ, २०१९), बुधवाः
![](https://www.lahananews.com/sites/default/files/2019-07-10t135506z2114556823rc15bb7a6990rtrmadp3cricket-worldcup-ind-nzl-1072019035619-1000x0.jpg)
भारतयात १८गू रनं बुकूसें न्यूजिल्याण्ड एकदिवसीय विश्वकपया फाइनलय् दुहां वंगु दु । आः उपाधिया नितिं न्यूजिल्याण्डं इङ्गल्याण्ड व अष्ट्रेलिया दथुइ जुइगु निगूगु सेमीफाइनलया विजेतालिसे वइगु आइतवाः म्हिती ।
निक्वःतकया च्याम्पियन भारतं लिग चरणय् छगू जक कासा बूगु खः । ल्याः धलखय् दकलय् च्वय् च्वनाः सेमीफाइनल थ्यंगु भारतया सशक्त ब्याटिङ पंक्ति थुकथं ध्वस्त जुइ धकाः म्हो मनुखं जक बिचाः याःगु जुइ ।
थुगु कासा बुइवं विश्वकपया हे मू दावेदार मध्ये छगू भारतया यात्रा सेमीफाइनलय् हे क्वचाःगु दु । थ्व स्वयां न्ह्यःया संस्करणय् नं भारत फाइनल थ्यंकेत ताःमलाःगु खः । न्यूजिल्याण्ड धाःसा फाइनलय् चीर प्रतिद्वन्दी अष्ट्रेलियालिसे पराजित जूगु खः ।
म्यानचेस्टरया ओल्ड ट्राफोर्ड कासाख्यलय् २४०गू रनया मध्यम लक्ष प्राप्त यायेगु नितिं कुहांवःगु भारतया शीर्ष क्रम हे ध्वस्त जूगुलिं इनिङ्गसया स्वंगू बल ल्यंदनिबलय् २२१गू रनय् फुक्कं आउट जुल । लिपांगु कासाय् शतक थ्वाःपिं भारतीय ओपनरपिं लोकेस राहुल व रोहित शर्मा समान १गू रनय् हे आउट जुल । कप्तान विराट कोहलीं नं १गू रन जक दयेकेफत । दिनेश कार्तिक ६गू रन दयेकाः आउट जूगु इलय् १०गू ओभरय् भारत ४गू विकेट तंकाः मुक्कं २४गू रनया स्थितिइ थ्यंगु खः ।
ऋषभ पन्त व हार्दिक पन्ड्यां ४७गू रनया साझेदारी यानाः इनिङ्ग थकायेगु कुतः याःसां नं २२गू फुति ५गू ओभरय् मन्त व ३०गू फुति ३गू ओभरय् पन्ड्या समान ३२गू रनया ब्यक्तिगत स्कोरय् आउट जुइवं भारत ९२–६या दयनीय अवस्थाय् थ्यंगु खः ।
७गूगु विकेटया नितिं पूर्व कप्तान महेन्द्र सिंह धोनी व रविन्द्र जडेजां ११६गू रनया साझेदारी यानाः भारतयात विजयया आशा ब्वलंकूगु खः । भारतयात विजयया नितिं ३२गू रन माःगु इलय् ७७गू रन दयेकाः म्हिताच्वंम्ह जडेजा ट्रेन्ट बोल्टया बलये लङ्ग अफ क्षेत्रय् कप्तान केन विलियम्सनया ल्हातिं क्याच आउट जूगु खः ।
जडेजां ४गू चौका व ४गू छक्का थ्वाःगु खः । मेगु ओभरय् धोनी नं रनआउटया शिकार जुइवं भारतया आशा क्वचाःगु खः । लोकी फर्गुसनया बलय् निगू रन कायेगु कुतलय् दुम्ह धोनीयात
मार्टिन गुप्टिलं रनआउट याःगु खः ।
न्यूजिल्याण्डया म्याट हेनरीं शीर्ष क्रमया ३म्ह ब्याट्सम्यानयात आउट यायेधुंकाः भारत मध्यक्रमय् लक्ष प्राप्त यायेगु नितिं असमर्थ जूगु खः । ट्रेन्ट बोल्ड व मिचेल सान्तरनरं नं निगू निगू विकेट काःगु खः ।
थ्व स्वयां न्ह्यः इङ्गल्याण्डया म्यान्चेस्टरय् न्यूजिल्याण्डं निर्धारित ५०गू ओभरय् ८गू विकेटया खतिइ २३९गू रन दयेकेधुंकाः भारतं मध्यम लक्ष प्राप्त याःगु खः । ६७गू रन दयेकूम्ह रोस टायलर ७गू रन दयेकाः आउट जुल । वय्कलं ९०गू बलय् ३गू चौका व १गू छक्का थ्वासें ७४गू रन दयेकाः आउट जूगु खः । व लिपा हे टोम लाथम नं १०गू रनय् आउट जुइधुंकाः न्यूजिल्याण्डं तःधंगु स्कोर दयेकेमफूगु खः ।
म्हिगः मंगलवाः भारत व न्यूजिल्याण्ड दथुइ सेमीफाइनल कासा जुयाच्वंगु इलय् वा वयेवं कासा द्यूगु खः । ‘रिजर्ब डे’कथं थौं ल्यंदनिगु कासा म्हितकूगु खः । थ्व स्वयां न्ह्यः मंगलवाः न्यूजिल्याण्डं टस त्याकाः ब्याटिङ यासें ४६गू फुति १गू ओभरय् ५गू विकेटया खतिइ २११गू रन दयेकूगु इलय् वा वःगु खः । लगातार वा वयेवं थुगु कासा ‘रिजर्ब डे’या नितिं लिछ्याःगु खः ।
खराब सुरुवात याःगु न्यूजिल्याण्डया नितिं कप्तान केन विलियम्सनं ६७गू रन दयेकूसें टिमया थकागु खः । वय्कलं हेनरी निकोलसलिसे ६८गू रनया साझेदारी याःगु खः । निकोलस धाःसा २८गू रनय् आउट जुल । बलिङपाखे भूवनेश्वर कुमारं ३गू विकेट काःगु खः ।
Categorized in कासा