भारतं थौं ७५क्वःगु स्वतन्त्रता दिवस हनाच्वन
गुंलाथ्व सप्तमी ११४१,साउन ३१ आईतवाः
भारतं थौं ७५क्वःगु स्वतन्त्रता दिवस हनाच्वंगु दु । भारतन्यंक अगष्ट १५या दिनय् स्वतन्त्रता दिवस हनेगु याइ ।
भारत सन् १९४७ या अगष्ट १५य् बेलायत साम्राज्यं मुक्त जूगु खः । भारतय् शासन यानाच्वंगु बेलायती सरकार सन् १९४७य् थौंया हे दिनय् भारत त्वःताः वनेधुंकाः भारत बेलायती साम्राज्यं मुक्त जूगु खः ।
स्वतन्त्रता व मुक्तिया लुमन्तिइ थौं भारतीय नागरिकं स्वतन्त्रता दिवस हनेगु यानाच्वंगु दु । थौंया दिनय् भारतया लालकिल्लाय् विशेष समारोह यायेगु याइ । थ्वयां न्ह्यः म्हिगः पाकिस्तानं ७५क्वःगु स्वतन्त्रता दिवस हंगु दु ।
व झ्वलय् भारतीय प्रधानमन्त्री नरेन्द्र मोदीं ट्वीट यानाः १४ अगस्ट अर्थात भारत व पाकिस्तान ब्वदःगु दिंयात थःपिन्सं विभाजन विभीषिका लुमन्ति दिवसया रुपं हनेगु निर्णय यानागु धयादीगु दु ।
नेपालस्थित भारतीय दूतावासं नं थौं थीथी ज्याझ्वः यानाः दिवस हनेगु न्ह्यथंगु दु ।
Categorized in राष्ट्रिय
