नेवाः हाइकु ख्यःया ग्वसालय् स्वक्वःगु भर्चुयल हाइकु सहलह ज्याझ्वः जूगु दु।

नेपालभाषा ख्यलय् हाइकु विधाया सिद्धान्त ५, ७ व ५ हे जुइमाःगु अन्तरराष्ट्रिय मान्यता कथं जुइमाः धका डा. आनन्द जोशीं धयादीगु दु। नापं हाइकु प्रकृतिइ जक लिमकुंसे मेमेगु बिषयस नं दुथ्याका वनेमाःगु थौंया आवश्यकता जुयावःगु धका धयादीगु दु।

नेवाः हाइकु ख्यलय् किपाःया लिधंसाय हाइकु ब्वयेगु व तुयु पुंनं ल्यया दिइगु झीपू हाइकु (किपाः ल्याः १८ निसे २१ तक) मुक्कं ४० पु हाइकुया बारे थःगु खँ तयेगु झ्वलय् पीपू हाइकु च्वहेजाःगु धासें लिपाया किपात समसामयीक जनजीवन नाप स्वापू दुगु समस्या, झाकाया आधारय् बिषय छनौत जूसा अझ बांलाइगु बिचाः तयादीगु खः ।

दक्षिण एशिया क्षेत्रय हे झीगु नेवाः हाइकुया स्तर च्वजाःगु कनादिसे थजाःगु हे कुतः निरन्तर न्ह्याकेफतसा हलिंया हाइकु अभियानय् नेवाः हाइकु धिसिलाक्क न्ह्यब्वयावने फइगु खँ जोशीं तयादीगु खः । उगुु ज्याझ्वलय् नेवाः हाइकु ख्यःया न्हूगु कुतः “सवाः“ हाइकु स्वलापौ जूम भर्चुयल पाखें पितब्वज्या जोशीं यानादीगु खः।

अथेहे उगु ज्याझ्वलय् कृष्णदास जोशी, अन्जना ताम्रकार, राधेश्याम महर्जन व प्रदिप तुलाधरपिसं निपु निपु हाइकु वाचन यानादीगु खः। ज्याझ्वःया प्राविधिक ग्वाहालि केशरमान ताम्राकारं यानादीगु खःसा सुरेश प्रधानं ज्याझ्वः न्ह्याकादीगु खः ।

बुखँ : नेवाः सूचना केन्द्र 

Categorized in राष्ट्रिय