भरतपुर महानगरपालिका २० या वडाध्यक्ष कोरोना मन्त
लहानान्युज | अनलागा ९ ११४०,असोज २५ आइतवाः
कोरोना संक्रमणया कारण भरतपुर महानगरपालिका २० या वडाध्यक्ष मणिलाल तामाङ मन्त। ६९ दँ दुम्ह तामाङ भरतपुर अस्पतालय् वासः याकेगु झ्वलय् थौं आइतवाः सुथय् ११ः३० बजे मदुगु धका अस्पतालया कोभिड संयोजकं जानकारी बिःगु दु।
वःगु असोज १४ गते पीसीआर परीक्षण यागुलि १६ गते वयात कोरोना पोजेटिभ रिपोर्ट वःगु खः। यक्को ज्वरो, मुसु व सासः ल्हायेगु समस्या वयेवं वयात असोज २३ गते भरतपुर अस्पताल भर्ना याःगु खः। व स्वया न्ह्यः भरतपुरया हे पुष्पाजली अस्पतालय् स्वन्हु वासः याना डिस्चार्ज जुगु खः।
हाकन स्वास्थ्यय् समस्या वयेवं वयात भरतपुर अस्पताल हःगु खः। चिनी ल्वय, उच्च रक्तचापया समस्या दुम्ह वयात अक्सिजनया मात्रा ४० य् क्वहा वःगुलि सघन उपचार कक्षय् तया वासः याःगु खः।
चितवनय् कोरोना संक्रमणं सीम्ह न्हापाम्ह जनप्रतिनिधि खः। स्थानीय तहया निर्वाचनय् नेपाली कांग्रेसपाखे वडाध्यक्षय् निर्वाचित जुगु खः।
Categorized in राष्ट्रिय
