बेलायती प्रधानमन्त्रीया किजापाखें सांसद व राज्यमन्त्रीपाखें राजीनामा
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
![](https://www.lahananews.com/sites/default/files/jo-johnson.jpg)
बेलायती प्रधानमन्त्री बोरिस जोनसनया किजा जो जोनसनं सांसद व राज्यमन्त्रीपाखें राजीनामा बियादीगु दु ।
अक्टोबर ३१तक सम्झौता जूसां मजूसां नं यूरोपियन युनियनपाखें अलग्ग जुइगु (ब्रेक्जिट) बचं याःम्ह बोरिसया उगु ग्वसालय् पंगः जूगु खः । वय्कःया कन्जरभेटिभ पार्टीया सांसद ब्रेक्जिटया विरोधय् दुं दु । सांसदत विपक्षय् दनेवं जोनसनं हाउस अफ कमन्सय् दुगु सामान्य बहुमत नं तंकूगु दु ।
अथे हे, ई न्ह्यः हे आमनिर्वाचन याकेगु जोनसनया प्रस्ताव नं संसदं अस्वीकृत याःगु दु । थःगु प्रस्तावयात ग्वाहालि मयाःगु धासें जोनसनं २१म्ह सांसदपिन्त निलम्बन यानादीगु दु । थ्व हे संकटया दथुइ बोरिसया किजा जो जोनसनं थौं विहिवाः सांसद व मन्त्रीपाखें राजीनामा बियादीगु खः ।
जो जोनसनं थः यक्व ई छेँजः व देसया हित मध्ये गुकियात ल्ययेगु धइगु द्विविधाय् लाःगु व अन्त्यय् देसया हितया पक्षय् निर्णय कयागु धयादिल ।
जो सन् २०१० निसें लगातार सांसद जुया वयाच्वनादीम्ह खः । २०१६या जनमत संग्रहया इलय् जों यूरोपियन युनियनय् च्वनेमाःगु पक्षय् भोट कुर्कादीगु खः ।
जो थेरेसा मेया सरकारय् नं मन्त्री जुयादीगु खः । तर दथुइ वय्कलं मे सरकारया मन्त्रीपाखें राजीनामा बियादीगु खः ।
वंगु जुलाइस दाजु बोरिस प्र्रधानमन्त्री जुइधुंकाः जो ब्यापार तथा शिक्षा मन्त्रालय जुनियर मन्त्री जुयादीगु खः ।
ब्रेक्जिटयात कयाः जोनसन परिवार हे विभाजित जूगु दु । बोरिस न्ह्याथे जूसां नं बेलायतयात यूरोपियन युनियनपाखें अलग्ग जुइमाः धइगु पक्षय् दुसा वय्कःया अबु व केहेँ यूरोपियन युनियनया कट्टर समर्थक खः ।
Categorized in अन्तर्राष्ट्रिय