बुद्ध जयन्ती समारोह व अन्तर्राष्ट्रिय बौद्ध सम्मेलन स्थगित
लहनान्युज | बछलाथ्व सप्तमी ११४०, बैसाख १८ बिहिवाः
हलियक महामारी जुयाच्वंगु कोरोना भाइरसया कारण लुम्बिनी जुइगु स्वक्वःगु अन्तर्राष्ट्रिय बौद्ध सम्मेलन स्थगित जुगु दु ।
लुम्बिनी विकास कोषं थौं बिहीवाः छगु विज्ञप्ति जारी यासे वैशाख २५ गते जुइगु २५६४ क्वःगुं बुद्ध जयन्ती मूल समारोह व स्वक्वःगु अन्तर्राष्ट्रिय बौद्ध सम्मेलनया ज्याझ्व स्थगित जुगु जानकारी बिःगु दु ।
लकडाउनया कारण वःगु दँय् थे अप्वो मनूत मुने मफइग् कारण कोष स्थगीत याःगु खः । स्वक्वःगु, अन्तर्राष्ट्रिय बौद्ध सम्मेलन ग्वसाः ग्वयेत संस्कृति, पर्यटन तथा नागरिक उड्डयनमन्त्री योगेश भट्टराईया अध्यक्षताय् समिति गठन याःगु खः ।
सचिवालय तक दयेका सम्मेलन यायेत्यःगु इलय् कोरोना महामारीया कारण ज्याझ्वः स्थगित याये माःगु धका धाःगु खः ।
बुद्ध जयन्ती व अन्तर्राष्ट्रिय बौद्ध सम्मेलनया लागि कोषं ४ करोड ध्यवा बजेट माग याःगु खःसा छगु करोड ध्यवा वार्षिक ज्याझ्वः कथं स्वीकृत जुइ धुकुगु खः ।
बुद्ध जयन्ती तथा लुम्बिनी दिवसया लसताय् लुम्बिनी विकास कोषं मायादेवी देगलय् सामाजिक दुरी कायम यासे बौद्ध भिक्षु व भिक्षुणी नाप लामा गुरुपिन्स प्रार्थना, पूजापाठ व २५६४ गु दीप प्रज्वलनया ज्याझ्वः तया तःगु खः ।
