बुटवलया मोतिपुरय् थौं नं कर्फ्यू
कौलाथ्व चतुर्थी ११४१, असोज २५ सोमबाः
रुपन्देहीया मोतिपुर औद्योगिक क्षेत्रय् आइतबाः प्रहरीलिसे जूगु ल्वापुइ ४म्ह सिइधुंका उगु क्षेत्रय् तःगु कफ्र्यु थौं नं न्ह्यागु दु ।
थप ल्वापु जुइगु भयलं स्थानीय प्रशासनं कफ्र्यु न्ह्याकातःगु खः । म्हिगःया ल्वापुइ घाःपाः जुया भैरहवा मेडिकल कलेजय् याकाच्वंपिं मध्ये ४ म्ह सीगु खः । वासः यायेगु नितिं यंकुपिं ८ म्ह मध्ये ४ म्ह सीगु खः ।
घाःपाः जूम्ह छम्हसिया अवस्था गम्भीर दु । सीपिं मध्ये कपिलवस्तु वाणगंगाया ४८दँया रमेश परियारया म्हसिका ध्वाथुगु दुसा ३म्हसिया अझं म्हसिका ध्वाथुइ फूगु मदुनि । ल्वापुइ नेपाल प्रहरीया १६म्ह व ससस्त्र प्रहरीया १५म्ह घाःपाः जूगु दु ।
पेट्रोल वम प्रहारं नेपाल प्रहरी व सशस्त्र प्रहरीया छम्ह छम्ह प्रहरी उपरीक्षक घाःपाः जूगु दु । घाःपाः जुंिपं प्रहरीत मध्ये ६म्हसित वासः यायेगु नितिं येँय् हःगु दु ।
सुकुम्बासीया नामय् छुं पुचःलं औद्योगिक क्षेत्रया जग्गा कब्जा यायेत स्वयेधुंका तनाव ब्वलंगु खः ।
Categorized in राष्ट्रिय