बिस्काः जात्रा सम्बन्धि अन्तरक्रिया क्वचाल
लहनान्यूज | चिल्लागा षष्ठी ११३७ (मार्च १८ २०१७)
![](https://www.lahananews.com/sites/default/files/bkt_0.jpg)
नेवाः पत्रकार राष्टिय दबू ख्वपया कचाया ग्वसालय् थौं ख्वपय् ‘बिस्काः जात्रा, भ्रम व यथार्थ’ विषयक अन्तरक्रिया ज्याझ्वः क्वचाःगु दु ।
ज्याझ्वलय् प्रा.डा. पुरुषोत्तम लोचन श्रेष्ठ, संस्कृतिविद् ओम धौभडेल, संस्कृतिविद् विनोदराज शर्मा, बिस्काः जात्रा सम्बन्धि अध्येता गोपाल धौबन्जारं बिस्काः जात्रा सम्बन्धि ऐतिहासिक दसित न्ह्यब्वयेगु लिसें सामाजिक मान्यताय् आधारीत किम्बदन्तिया विश्लेषण यानादीगु खः ।
ज्याझ्वलय् नवासें प्रा.डा. पुरुषोत्तम लोचन श्रेष्ठं बिस्काः जात्रा धयागु बि अथवा सर्प सिनाः न्यायेकूगु जात्रा ख हे मखूगु दावी यानादिल । थ्व विश्वनाथ भैरवया जात्रा जूगुलिं विश्व जात्रा धाःगु व उकिं हे लिपा वनाः बिस्काः जात्रा जूवंगु वयकःया धापू खः ।
नवदुर्गा द्यः प्याखनय् च्यान्हु पुलांगु हि द्यःयात त्वंकीगु परम्परा ‘बिहि त्वनेगु’या दसु न्ह्यब्वसें डा. श्रेष्ठं ‘बि’या अर्थ पुलांगु अथवा बासि धयागु अर्थय् नं कायेज्यूगु धयादिल । व अर्थय् बिस्काः जात्रा धयागु प्राचीन जात्रा नं खःगु डा. श्रेष्ठं धयादिल ।
अथे हे संस्कृतिविद् विनोदराज शर्मां बिस्काः जात्राया पूजा न्ह्याकेबलय् ‘विश्वजात्रा महापर्वणी’ धकाः संकल्प वाक्य कायेमाःगु जूगुलिं नं थ्व विश्व जात्रा हे खःगु धयादिल । गोपाल धौबन्जारं किम्वदन्तियात पूवंक विश्वास यायेफइगु अवस्था मदुसां सर्प स्याःगुया अर्थ शत्रु नास याःगु अर्थय् कायेफइगु वा उगु इलय् शत्रुयात स्यानाः राज्यया रक्षा याःगु जुइफुगु धयादिल ।
![](http://www.lahananews.com/sites/default/files/pictures/highlight-bkt.jpg)
संस्कृतिविद् ओम धौभडेलं बिस्काः जात्रा सम्बन्धि समाजय् प्रचलित थीथी किम्वदन्तिया जानकारी ब्युसें उकिया विश्लेषण नं यानादिल । लिसें धौभडेलं नेपालय् थीथी थासय् न्यायेकीगु बिस्काः जात्राया बारे नं जानकारी बियादिल ।
उकिया लिसें संस्कृतिविद् धौभडेलं बिस्काः जात्राया यःसिँलय् च्वनीगु ध्वजा विश्वया दक्कले ताःहाकःगु ध्वजा व नेपाःया झण्डायात हलिंया दक्कले पुलांगु राष्ट्रिय ध्वाँय् कथं गिनिज रेकर्डया नितिं दाबी यायेमाःगु धयादिल ।
ज्याझ्वलय् दबू ख्वप कचाया छ्यान्जे सिमान्त शिल्पकारं लसकुस न्वचु ब्युसें ज्याझ्वःया उद्देश्यबारे नं कनादीगु खः ।
![](http://www.lahananews.com/sites/default/files/pictures/bkt-1.jpg)