बाँकेय् कोरोनां छम्ह सीत
लहनान्युज | तछलागा द्धादशी ११४०,असार ३ बुधवाः
बाँके नेपालगन्ज मेडिकल कलेजय् वासः याका च्वम्ह छम्ह मिसा कोरोना संक्रमण पुष्टि जूगु खः ।
बैजनाथ गाउँपालिका ६ याम्ह ४६दँयाम्ह उम्ह मिसा नेपालगन्ज मेडिकल कलेज तथा शिक्षण अस्पताल कोहलपुरय् आईसीयुलय् सोमवाः बहनि ६ बजे सीगु दु ।
उम्ह मनूयाःगु मंगलवाः बहनी कोरोना रिपोर्ट पोजेटिभ वःगु धका बाँकेया प्रमुख जिल्ला अधिकारी राम बहादुर कुरुम्वाङं धाःगु खः ।
उम्ह मिसा निमोनिया ल्वय् दुम्ह खः । स्वास्थ्य अवस्था गम्भीर जूगुलि वःगु जेठ ३० गते वयात अस्पताल भर्ना याःगु खः ।
बाँकेय् कोरोना भाइरसं सीपि थ्व नाप निम्ह थ्यःगु दु । थ्व स्वया न्ह्य जेठ ४ गते बाँकेया नरैनापुर गाउँपालिका–५ या २५ दँ दुम्ह छम्ह न कोरोनां हे सीगु खः ।
थ्व नाप नेपालय् आतक कोरोनां सीपि १९ म्ह थ्यःगु दु ।
