बजेट संकटया अवसरं हिलेगु मौका गुमे यात डा. रिजाल
लहनान्युज | तछलाथ्व नवमी ११४०,जेठ १८ आइतवाः
![](https://www.lahananews.com/sites/default/files/DR-MINENDRA-RIJAL.jpg)
नेपाली कांग्रेसा सांसद डा. मिनेन्द्र रिजालं सरकार संकटयात अवसरय् हिलेगु मौका गुमे यायेःगु टिप्पणी याःगु दु ।
वइगु आर्थिक वर्षया बजेट राजश्व व व्ययया अनुमानया छलफलय् रिजालं देशय् संकटपाखे जोगे याना आर्थिक विकास यायेगु अवसर बजेटं गुमे याःगु धका धयागिु दु ।
थुगु इलय् देय् संकटय् दु । दुनिया शताब्दीया हे तधःगु संकट दु । थ्व संकटयात अवसरय् हिलेगु कल्पनाशीलता बजेटया अपेक्षा याःगु खः ।
बजेटय् उल्लेख याःगु ज्याय् ध्यवा गन वइगु धका नेता रिजालं अर्थमन्त्री डा. युवराज खतिवडायात न्ह्यसः यानादिगु दु । कोरोना नियन्त्रण तथा रोकथामया लागि स्थानीय तहबाहेक मेपिन्स ज्या याये मफुगु अवस्थाय् बजेट मबिगु धका धयादिगु दु ।
स्थानीय तहयात सशर्त अनुदान बाहेक दक्को घटे याःगु धका धयादिसे नेता रिजालं संघीयता बलाक्केगु अधिकार तक सरकारं गुमे याःगु दु धका टिप्पणी यानादिगु दु ।
रिजालं स्वास्थ्य क्षेत्रय् २२, २३ अर्ब बजेट जक छुटे याना मगाःगु, कोरोना रोकथाम तथा नियन्त्रणया लागि छुटे याःगु ६ अर्ब ध्यवा परीक्षण यायेत तक माः धका धयादिगु दु । ‘६ अर्ब परीक्षणया लागि खर्च जुइ ।
अझ न अर्थतन्त्र उद्धारया ज्या गये याना यायेगु, राहतया ज्या गये याना यायेगु धका न न्ह्यसः तयादिगु दु ।