प्रिमियर लिग ः चेल्सी व म्यानयु ज्वलिंज्व
कछलागा दशमी ११४२, मंसीर १३ सोमवाः
![](https://www.lahananews.com/sites/default/files/chel.jpg)
इंग्लीश प्रिमियर लिग फुटबलय् शिर्ष थाय्या चेल्सीं म्यान्चेस्टर युनाइटेडलिसे ज्वलिन्ज्वः म्हितुगु दु ।
वंगु चान्हय् चेल्सीया मैदानय् जूगु कासा १गू–१गू गोलया ज्वलिन्ज्वःलय् क्वचागु खः । कासाय् म्यान्चेस्टर युनाइटेडया जेडन सन्चों न्हापांगु गोल याःसा नं चेल्सीया जर्गिनों पेनाल्टी मार्फत ज्वलिन्ज्वः गोल याःगु खः ।
वंगु चान्हय् जूगु मेगु कासाय् म्यान्चेस्टर सिटींं वेष्ट ह्याम युनाइटेडयात २गू–१गूया गोल अन्तरं बुकुबलय् लेष्टर सिटीं वाट्फोर्डयात ४गू–२गूया गोल अन्तरं बुकुगु दु ।
अथेहे ब्रेन्टफोर्डं एभर्टनयात १गू–०या गोल अन्तरं बुकुबलय् टोटनह्यामहट्सपर व बर्नले दथुया कासा खराब मौसमया हुनिं लिछ्यागु दु ।
वंगु चान्हय्सिया कासालिपा इंग्लीश प्रिमियर लिग फुटबलया ल्याः धलःखय् १३गू कासां ३०गू ल्याः मुंकुगु चेल्सी शिर्ष थासय् दु ।
उतिग्यंक कासां २९ गू ल्याः मुंकुगु म्यान्चेस्टर सिटी निगूगु थासय् दूबलय् ३गूगु थासय् दूगु लिभरपुलया २८गू ल्याः जूगु दु । २३गू–२३गू ल्याः मुंकुगु वेष्ट ह्याम युनाइटेड व आर्सनल छसिकथं ४गूगु व ५गूगु थासय् दु ।
Categorized in कासा