प्रधानमन्त्री प्रचण्डया सम्पत्ति विवरण सार्वजनिक
लहनान्यूज | थिंलागा पारु ११३७ (डिसेम्बर १४ २०१६)
![](https://www.lahananews.com/sites/default/files/prachanda-pushpa-dahal_759.jpg)
सरकारं प्रधानमन्त्री पुष्पकमल दाहाललिसें बहालवाला मन्त्रीतयगु सम्पत्ति विवरण सार्वजनिक याःगु दु ।
सार्वजनिक विवरण कथं प्रधानमन्त्री पुष्पकमल दाहालया नामं छुं छकू नं सम्पत्ति मदु । पैतृक सम्पत्तिइ ३ तोला लुँ व चितवनय् १ख कट्ठा बुँ जक दु ।
थुगु सम्पत्ति विवरणया कथं प्रधानमन्त्री दाहाल सुशील कोइराला धुंकाः नेपाःया निम्हम्ह गरीब प्रधानमन्त्री जूगु दु । स्वंगः मोबाइल फोन जक सम्पत्ति दुगु धाःम्ह सुशील कोइरालायात हलिंया हे गरीब प्रधानमन्त्री धाःगु खः ।
व हे कथं, उपप्रधान अले गृहमन्त्री विमलेन्द्र निधिया थीथी बैंकय् सेयर, ख्वप व धनुषा जिल्लाय् बुँ अले लुँ दुगु मन्त्रिपरिषदया ज्याकुथिं न्ह्यथंगु दु । ज्याकूया कथं गृहमन्त्री निधियाके ६० तोला लुँ, १५० तोला वहः व १० लाख ९६द्वः स्वयां आपाः धेबा दु ।
मेम्ह उपप्रधान अले अर्थमन्त्री कृष्णबहादुर महराया रोल्पाय् ८ रोपनी बुँ व एभरेस्ट बैंकय् ८०द्वः तका दुगु न्ह्यथंगु दु ।
सहरी विकासमन्त्री अर्जुन नरसिंह केसी, भौतिक पूर्वाधार अले यातायातमन्त्री रमेश लेखक, ऊर्जामन्त्री जनार्दन शर्मा, परराष्ट्रमन्त्री डा. प्रकाशशरण महतलिसें २७ मन्त्रीया नं सम्पत्ति विवरण सार्वजनिक याःगु खः । अथे हे, १४ राज्यमन्त्रीया नं सम्पत्ति विवरण सार्वजनिक यानागु मन्त्रिपरिषदया ज्याकुथिं न्ह्यथंगु दु ।
Categorized in राष्ट्रिय