प्रधानमन्त्री कप क्रिकेट कासाय् एपिएफपाखें प्रदेश नं. ३ पराजित
लहनान्युज | ने.सं. ११३९ बछलागा षष्ठि (२५ मे, २०१९), सञ्चरवाः
![](https://www.lahananews.com/sites/default/files/prime-minister-cup.jpg)
प्रधानमन्त्री कप एकदिवसीय राष्ट्रिय क्रिकेट कासाय् विभागीय पुचः सशस्त्र प्रहरी बल (एपिएफ) त्यात ।
किपूया त्रिविवि क्रिकेट कासाख्यलय् थौं सञ्चरवाः जूगु कासाय् एपिएफं राष्ट्रिय पुचःया कप्तान पारस खड्का नेतृत्व दुगु प्रदेश नं. ३यात ४१गू रनं बुकूगु खः ।
एपिएपफं ब्यूगु २८९ रनया तःधंगु लक्ष प्राप्त यायेगु झ्वलय् प्रदेश नं. ३ मुक्कं २४७गू रनय् सीमित जुल ।
प्रदेश नं. ३पाखें क्वःछिनातःगु ५०गू ओभरय् गुंगू विकेटया क्षतिइ मुक्कं २४७गू रन जक दयेकेफूगु खः । उकिया नितिं ज्ञानेन्द्र मल्लं दकलय् अप्वः ११७गू रन योगदान ब्यूगु खः । अथे हे कप्तान पारस खड्कां ४६गू, रीत गौतमं २७गू व इशान पाण्डें १२गू रन दयेकूगु खः । तर मेमेपिं कासामिपिन्सं धाःसा न्ह्यथनेबहःगु ब्वज्या यायेमफत ।
एपिएफया कमलसिंह ऐरीं ३गू व अविनाश बोहरां २गू विकेट काल । पृथु बास्कोटा व भूवन कार्कीं समान छगू छगू विकेट काःगु खः ।
थ्व स्वयां न्ह्यः टस त्याकाः न्हापां ब्याटिङ्ग याःगु एपिएफं क्वःछिनातःगु ५०गू ओभरय् ९गू विकेटया क्षतिइ २८८गू रन दयेकूगु खः । उकिया नितिं सुमीत महर्जन व कप्तान पृथु बास्कोटां अर्धशतकीय इनिङ्गस् म्हितल । सुमीतं ९४गू रन दयेकूगु खःसा पृथु बास्कोटां ५९गू रन दयेकल । अथे हे प्रदीप सिंह ऐरीं ४०गू, अमरसिंह रौटेलां अविजित २७गू रन दयेकूगु खः ।
प्रदेश नं ३ या नन्दनकुमार यादव व जीतेन्द्र ठकुरीं ३/३गू विकेट काःगु खः ।
Categorized in कासा