प्रदेश सरकारया उजंया अवज्ञा
![](https://www.lahananews.com/sites/default/files/field/image/lahana_4.jpg)
जुजुमान महर्जन
तमु अर्थात गुरुङतय्गु तःजिगु नखः तमु ल्होसारया ध्यानय् तयाः गण्डकी प्रदेशया सरकरपाखें प्रदेशन्यंक सार्वजनिक विदाया घोषणा याःगु खः । वंगु शुक्रवाः प्रदेश सरकारया मन्त्री परिषद्या मुँज्या च्वनाः उ कथं बिदा बीगु घोषणा याःगु खः । थ्व छगू बांलाःगु निर्णय जक मखु, आदिवासी जनजाति तय्गु नखःया महत्वयात थुइकाःउकियात सम्मान याःगु कथं झीसं थुइके माः । थुकियात नं झीसं सम्मान हे याय्माः ।
प्रदेश सरकारया निर्णययात कयाः सम्बन्धित प्रदेशया फुक्क निकायपाखें उकियात नाला काय् माःगु खः, तर अजू चायापूगु खँ छु धाःसा उगु दिनस सार्वजनिक विदाया घोषणा याःसां उकि यात अवज्ञा याय्गु ज्या नं जुल । खय्त ला सरकारी ज्याकू व ब्वनेकुथिपाखें उकियात पालना यानाः विदा बियाःजनजातिया नखःयात सम्मान याःगु खने दुसां संघ अन्तरगतया ज्याकू धाःसा चाःगु खनेदु । अर्थात उगु दिनस ब्यूगु सार्वजनिक विदायात अवज्ञा याःगु दु ।
विशेष यानाः संघ अन्तरगत दुगु जिल्ला प्रशासन ज्याकू, नेपाल राष्ट्र बैंक व मेमेगु सरकारीलिसें निजी बैंक व बित्तीय संघ संस्था प्रदेशं निर्णय याःगु बिदा मकाःगु खः । उमिगु धापू कथं गृहमन्त्रालयया प्रस्तावय् संघीय सरकारं निर्णया याःसा जक बिदा दइगु खः । उकिं थुगु प्रस्तावयात स्वीकार याय् थाकुइगु धापू दु ।
थुगु धापूतिं आःतक नं प्रदेश सरकारयात थःगु अधिकार छ्यलेगु अवस्था मदुनि धकाः धाय्फु । संघीय सरकारं बियातःगु सार्वजनिक विदाय् थुगु नखः लाना च्वंगु मदु । उकिं थुगु बिदाया माने याय् माःगु हे बाध्यता मदुगु खः । तर अन्तर प्रदेश परिषदया मुँज्यापाखें प्रदेश सरकारपाखें खुन्हु बिदा बीगु व्यवस्था याय्गु क्वः छ्यूगु खः ।
प्रदेश सरकारपाखें ब्यूगु बिदायात दुवाला स्वय्गु खःसा थ्व विदा जायज नं खः । तमु अर्थात गुरुङ तय्गु बाहुल्यता दुगु थुगु प्रदेशय् सम्बन्धित जातिया तःधंगु नःखः यात कयाः बिदा बीगु स्वभाविक जक मखु, आवश्यकता नं खः । स्थानीयभाषा, संस्कृतिया जगेर्ना याय ्माःधकाः नारा बीमाः धकाः माग याना च्वंगु इलय् भाषा, संस्कृतियात संरक्षण सम्बद्र्धन याय्गु कथंया थजाःगु ज्यायात कयाः अवहेलना याय्गु छगू कथं जनजातिया अपमान खःसा थ जाः गु खँय् संघीय सरकारं नं बिचाः याय् माःगु खनेदु ।
हरेक खँय् संघीय सरकारया निर्णययात जक पिया च्वने माःगु खःसा प्रदेश सरकारया औचित्य यात कयाः न्ह्यसः ब्वलनीगु स्वभाविक खः । अथे हे प्रदेश सरकारया निर्णययात कयाः अवज्ञा याइगु खःसा थुकियात कयाः सुनां च्यूताः काय्गु खः ?
नेपाः बहुजातीय, बहु साँस्कृतिक देय् धकाः पहिचान बीगु खःसा हरेक आदिवासी जनजातिया संस्कृति, भाषायात सम्मानबी सय्के माः । नारा धाःसा बांलाःगु बीगु तर उकियात कार्यान्वयन याय्गु ज्याय् धाःसा पलाः मन्ह्याकेगु खः साथ किया छुं अर्थ दइमखु । खय्त लाथु किया न्हापांगु संकेत प्रदेशया नामाकरणं हे क्यने धुंकूगु दु । उकिं थजाःग्ु खँय् सम्बन्धित निकाय लिसें आदिवासी जनजाति सचेत जुइ माःगु आवश्यक खनेदु ।