प्रचण्ड व नेपाल समुहपि निर्वाचन आयोगय्
लहानान्युज | थिंलाथ्व नवमी ११४० पुस ८ बुधवाः
नेपाल कम्युनिस्ट पार्टी (नेकपा) पुष्पकमल दाहाल प्रचण्ड व माधवकुमार नेपाल समूहपाखे मंगलवाः केन्द्रीय कमिटी बैठकं याःगु निर्णय थौं बुधवाः निर्वाचन आयोगय् बुझे याःगु दु।
बुधवाः केन्द्रीय सदस्य सुरेन्द्र पाण्डे व मुक्तिनारायण प्रधानपिन्स निर्वाचन आयोगय् वना प्रधानमन्त्री केपी शर्मा ओलीयात अध्यक्षपाखे निश्कासन यानागु निर्णय पेश याःगु खः ।
नेता पाण्डया कथं आयोगय् बुझे याःगु पत्रय् नेकपाया ४४७ सदस्यीय केन्द्रीय कमिटीया २९० म्हेसिगु नां उल्लेख याःगु खः ।
उकि मध्ये २८७ म्हेसिगु ल्हाचिं दु धका पाण्डें धाःगु दु। स्वम्ह स्वनिगः पिने जुया ल्हाचिं मदु धका धाःगु खः।
बुधवाः हे प्रचण्ड व माधव समूहया बैठकं अध्यक्ष ओलीयात अनुशासनया कारबाही यासे अध्यक्षपाखे निश्कासन यानागु व माधवकुमार नेपालयात अध्यक्ष ल्यःगु निर्णय याःगु खः ।
उगु हे निर्णय निर्वाचन आयोगय् बुझे याः वःगु खः। थ्व स्वया न्ह्यः मंगलवाः हे केपी शर्मा ओली समूहपाखे केन्द्रीय कमिटीया बैठकपाखे ४४७ सदस्यीय केन्द्रीय कमिटीयात विस्तार याना ११९९ सदस्यीय दय्काःगु दु धका जानकारी आयोगयात बिःगु खः।
Categorized in राष्ट्रिय