पोर्टोयात बुकाः मड्रिड च्याम्पियन्स लिग फुटबलया नकआउट चरणय्
थिंला पंचमी ११४२, मंसीर २२ बुधवाः
![](https://www.lahananews.com/sites/default/files/atlico_1.jpg)
एफ.सी पोर्टोयात बुकाः एथ्लेटिको मड्रिड युएफा च्याम्पियन्स लिग फुटबल धेंधें बल्लाःया नकआउट चरणय् दुहांवंगु दु ।
वंगु चान्हय् जूगु पुचः बि या कासाय् स्पेनया एथ्लेटिको मड्रिडं पोर्चुगलया एफ.सी पोर्टोयात ३–१ गोलं बुकाबिल । एथ्लेटिकोयात त्याकाबीत एन्टोसनयो ग्रिजमन, एन्जल कोरिया व रोड्रिगो डे पउलं १, १ गोल यात ।
पोर्टोया सर्जियो ओलिभिएरां १ हःपाः गोल यात । थ्व कासाय् पोर्टोया निम्ह कासामि अले एथ्लेटिकोया छम्ह कासामिं ह्याउँगु कार्ड नःगु खः । कासा त्याःगुलिसें एथ्लेटिको राउण्ड अफ सिक्सटिनय् थ्यंबलय् पोर्टो धाःसा पिहांवंगु दु ।
च्याम्पियन्स लिगया हे मेगु कासाय् थःथःगु कासा त्याकाः लिभरपुल व आयाक्स एम्सटरडमं पुचः झ्वःया दक्वं खुगुलिं कासा त्याकुगु किर्तीमान दयेकूगु दु ।
थ्व सिजनय् बांलाःगु कासा क्यनाच्वंगु लिभरपुलं पुचःया लिपांगु कासाय् इटालीया एसी मिलानयात २–१ गोलं बुकाबिल । अथे हे, नेदरल्याण्ड्सया आयाक्सं पोर्चुगलया स्पोर्टीङयात ४–२ गोलं ल्यूने लाकाबिल ।
फ्रान्सया पेरिस सेन्ट जर्मेन (पिएसजीं) बेल्जीयमया क्लब ब्रुजयात ४–१ गोलं बुकूबलय् जर्मनीया आर.बी लेप्जीगं इंग्ल्याण्डया म्यान्चेस्टर सिटीयात २–१ गोलं त्याकल ।
उखे जर्मनीया बोरुसिया डर्टमण्डं टर्कीया बेसिक्तासयात ५–१ या तःधंगु गोल अन्तरं बुकूबलय् स्पेनया रियाल मड्रिडं इटालीया इन्टरमिलानयात २–० गोलं बुकल ।
Categorized in कासा