पोखराय् देय्न्यंकंया सामुदायीक रेडियो सम्मेलन
लहनान्युज | सिल्लाथ्व नवमि ११३८ (जनवरी २६ २०१८)
सामुदायिक रेडियो प्रसारक संघया ग्वसालय् शुक्रवाः निसें निन्हुयंकंया सामुदायिक रेडियो राष्टिय सम्मेलन सुरु जूगु दु । पोखराया लेकसाइटं सुथ न्हापां नसंचा हुलेगु ज्या याःगु खः ।
दय्न्यंकंया स्वसःसिबें अप्वः सामुदायीक रेडियोया प्रतिनिधि तयेसं ब्वति कयादीगु उगु सम्मेलन ग्रायण्डी होटलय् थ्यंकाः औपचारिक ज्याझ्वः न्ह्याःगु खः । ज्याझ्वलय् सामुदायीक रेडियो व मस्त तयेगु भूमिका, हिला वनाच्वंगु परिस्थितिइ सकारात्मक सामाजिक रुपान्तरणया योगदानय् रेडियोया मू अवसर व हाथ्या, सामुदायीक रेडियो व रेडियोयात हाथ्यायात कया पुचः पुचः दयेका सहलह ब्याकेगु ज्या तकं जूगु खः ।
ज्याझ्वलय् केन्द्रीय वाल कल्यान समितिया आत्मराम थापा, सामुदायिक रेडियो प्रशारक संघया नायः सुवा खतिवडा, रेडियो नेपालया कर्यकारी निर्देशक सुरेशकुमार कार्की, प्रशारक संघया नायः गोपाल झा, भिमेश्वर गाउँ पालिकाया इश्वर पाण्डे, एकोरायबया गोविन्द देवकोटा नापं थीथी ब्यक्तित्व पिन्सं सामुदायीक रेडियों मुलुकय् हिउपाःया नितिं यानाच्वंगु योगदानया चर्चा यासेंं अझ अप्वः ज्या यायेमाः धकाः बः बियादिल ।
समाजय् सकारात्मक रुपान्तरणया नितिं सामुदायीक रेडियो धइगु मू नारा बिया याःगु उगु सम्मेलनय् संघीय संचनाय् वने धुंकूगु अवस्थाय् आः सामुदायीक रेडियो व स्थानीय सरकार नापं प्रदेश सरकारया भूमिकाया बारे थीथी बिचाः प्वंकेगु ज्या यानादीगु खः । अथे हे आःया अवस्थाय् सामुदायीक रेडियो पाखें समाजय् हिउपाःया नितिं सामाजिक मुद्दायात निरन्तर रुपं ल्ह्वना वनेमाःगु खँय् बः बियादीगु खः ।
सम्मेलनया दथुइ हे सामुदायिक रेडियो प्रसारक संघया झिंस्वक्वःगु दँमुँज्या पुलांम्ह प्रधानमन्त्री नापं एमालेया अध्यक्ष केपी शर्मा ओलीं उलेज्या यानादीगु खः । ज्याझ्वलय् मूपाहां शर्मां सामुदायिक रेडियो प्रसारक संघया दँमुज्या पाखें वइगु सुझावयात भावी सरकारं नाला वनेगु जुइ धयादिल । वय्कलं आःया अवस्थाय् देउवा सरकारं अन्तिम ई थ्यंकाः नं गुगु कथं मन्त्री मण्डलपाखें निर्णय याना वनाच्वन उकियात कया आपत्ति तकं प्वंकादिल ।
अथे हे वय्कलं नेपालया संविधानय् छु समुदायया नितिं गन विभेद यानातःगु दु व ज्वना वल धाःसा सहलह ब्याका संशोधन यायेत थःपिं तयार दु धकाः तकं धयादिल । अथे हे वय्कलं सामुदायीक रेडियोयात भावी सरकारं माःगु कथं ग्वहालि यायेगु जुइ धकाः नं धयादिल ।
अथे हे विशेष पाहां पुलांम्ह उपप्रधानमन्त्री नापं माओवादी केन्द्रया नेता कृष्णबहादुर महरा, नेपाली कांग्र्ुेसया प्रवक्ता विश्वप्रकाश शर्मा, राजपाया नेता मनिष सुमन लगायतया नेता नापं थीथी ब्यक्तित्वपिन्सं न्वंवानादीगु खः ।
