पुष्करलालया ‘यात्रा विदेशको चिन्ता स्वदेशको’ सार्वजनिक
नृपेन्द्रलाल श्रेष्ठ | कछलाथ्व चतुर्दशी ११४१, मंसिर १४ आइतवाः
नेपाली आधुनिक पत्रकारिताया संस्थापक पुष्करलाल श्रेष्ठं च्वयादीगु यात्रा वृत्तान्त ‘यात्रा विदेशको चिन्ता स्वदेशको’ नां सफू पुस्तक सार्वजनिक जुगु दु।
श्रेष्ठं प्रतिष्ठापित यानादीगु कामना समूहया ३७ क्वःगु वार्षिकोत्सवया लसताय् उगु यात्रा स्मरण वयकलं युरोप, अमेरिका, अफ्रिका व एसियाया थीथी देय् भ्रमणया झ्वलय् रोचक व मार्मिक अनुभव दुथ्याका तःगु खः।
कामना न्यूज पब्लिकेसन्स् प्रालिपाखे प्रकाशित उगु सफू स्वदेश व विदेशया अवस्थायात तार्किक व मार्मिक ढंगं याना तःगु तुलनात्मक विश्लेषण, नेपाली पत्रकारिताया विकासय् प्राप्त जूगु उपलब्धि व चुनौती, राजनीतिक विकृति नाप वःगु निगु दशकया स्वदेश व विदेशय् जूगु यक्को प्रभावशाली घटनाया सन्दर्भ दुथ्याका तःगु दु।
उगु सफूतिइ पुष्करलालं देशप्रतिया च्यूता, मतिना व अपेक्षा अभिव्यक्त याःगु दु । करिब सच्छिगु देश चाःहिले धुकुम्ह श्रेष्ठं अन याःगु बालागु अभ्यास थःगु देशय् गये याना हये फइ विषयय् च्यूता काःगु खः । नेपालय् थज्याःगु बालागु अभ्यास मजुगु व देशय् समृद्धि ह्यूपा हय्मफुया लिउने नेतृत्व व व्यवस्थापनय् खने दुगु कमजोरी कारक दुगु विश्लेषण उगु सफूति दुथ्याका तःगु दु।
मानवीय भावना व संवेदनायात श्रेष्ठं थःगु यात्रा वृत्तान्तय् मार्मिक ढंगं दुथ्याका तःगु दु। माओवादी सशस्त्र द्वन्द्वया कारण देय् त्वःता अमेरिका विस्थापित जूपि, श्रेष्ठं दुःख व तनाबया सन्दर्भ न्यना अमेरिकाया आप्रवासनय् च्वनाच्वपि नेपालीपिनिगु नुँगः ख्वगु अनुभूतिं जक पाठकपि भावविह्वल जूगु वयकःया यात्रा वृत्तान्तं आम पाठकपिनिगु मन त्याकिइगु विश्वास प्रकाशन संस्था कयातःगु दु।
नेपाली पत्रकारिताया संस्थागत विकासय् खनेदुगु उतार–चढाव व दुने थ्यकः थुइकेगु लागि न ‘यात्रा विदेशको चिन्ता स्वदेशको’ ब्बने हे माःगु स्रोत सामग्री जुइफु।
सफूति कूटनीतिक सन्दर्भय् खँ न दुथ्याका तःगु दु । सरकार व प्रशासनिक निकाययात सुझाव व सल्लाह न च्वमि बिया तःगु दु ।
नेपालया अवस्था थुइकेत ‘यात्रा विदेशको चिन्ता स्वदेशको’ यक्को ग्वाहालि जुइफु थुगु सफू । पित्तथैलीइ पत्थर थाःगु धका झीदँ तक दुःख फयच्वम्ह श्रेष्ठयात नेपालया डाक्टरं ग्यास्ट्रिक धका वासः नका तःगु, फुटबल म्हिता तूति बाङ्गो जुया पुलिइ समस्या जुया ३५ दँ न्ह्यः मर्के जुगु तुतिइ ब्यान्डेज जक चिका वीर अस्पतालपाखे डिस्चार्ज याःगु, उगु हे लिच्वः कथं जीवनभर खेलजीवनपाखे संन्यास कायेत बाध्य जुइमाःगु वयकःया मार्मिक सन्दर्भ सफूति दुथ्याका तःगु दु ।
उगु सफूतिइ सञ्चारविद् प्रा. पी. खरेल, नागरिक समाजया अगुवा नाप चिकित्सक डा. सुन्दरमणि दीक्षित, पूर्व प्रधानसेनापति रुक्माङ्गद कटवाल थे जाःपि वरिष्ठ व लोकह्वाःपि मनू तयेसं थःथःगु बिचाः तयातःगु दु। २०७६ वैशाख ४ गते ६० दँय् मत्यकं हे मदुम्ह श्रेष्ठया बारेय् वयकःया काय्पि दिरेकलाल श्रेष्ठ व अनुजलाल श्रेष्ठं अबुयात याःगु विश्लेषण न सफूति दुथ्याका तःगु दस, सू मिडिया उद्योगयात स्थायित्व प्रदान याये चाहे जुपि हरेक नेपालीया लागि ब्बनेदइ ।
पुष्करलालं ६० दँ लिपा सक्रिय पत्रकारिता व मिडिया व्यवस्थापनया नेतृत्वपाखे आंशिक अवकास कायेगु व प्यंगु सफू प्रकाशन यायेगु योजना दयेका तःगु खः। थुकिइ यात्रा वृत्तान्त, राजनीतिक गतिविधि, आम सञ्चार व आत्मकथा याना प्यंगु विधाय् च्वसू न्ह्याका तःगु व न्हापागु सफू ६१ गु बुदिंया दि २०७६ साल साउन २५ गते विमोचन यायेगु वयकःया योजना दुगु खः।
Categorized in राष्ट्रिय
