पुलांम्ह प्रधानन्यायाधीस मदुगुलिं आइतवाः फुक्क अदालत बन्द जुइगु
लहनान्युज | ने.सं. ११३९ बछलागा षष्ठि (२५ मे, २०१९), सञ्चरवाः
![](https://www.lahananews.com/sites/default/files/kp%20oli_0.jpg)
सर्वोच्च अदालतं पुलांम्ह प्रधानन्यायाधीस नयनबहादुर खत्री ९६दँया बैंशय् मदुगु शोकय् कन्हय् आइतवाः फुक्क अदालतय् बिदा बीगु क्वःछ्यूगु दु ।
सर्वोच्च अदालतया मुख्य रजिष्ट्रार नृपध्वज निरौलां थौं सञ्चरवाः पिथंगु प्रेस विज्ञप्तिइ पुलांम्ह प्रधानन्यायाधीस खत्री मदुगु दुःखय् कन्हय् जेष्ठ १२ गते आइतवाः देय्न्यंकया जिल्ला, उच्च, सर्बोच्च, विशेष व न्यायाधिकरण शोक विदाकथं बन्द जुइगु न्ह्यथनातःगु दु ।
अल्जाइमर ल्वचं कयाः मेडिसिटी अस्पताल नक्खुइ वासः यायेगु झ्वलय् वंगु बुधवाः मत्यवं मदुम्ह खत्रीया थौं सञ्चरवाः पशुपति आर्यघाटय् अन्त्येष्टि याःगु खः ।
यलया मेजर दिलबहादुर खत्री व मां अप्सरादेवी खत्रीया कोखं वि.सं. १९८० असोज ३ गते जन्म जूम्ह खत्री वि.सं. २०३३ साल साउन २४ गतेनिसें २०४२ मंसीर २५ गतेतक सवोच्च अदालतया प्रधानन्यायाधीस जुयाः ज्या यानादीगु खः ।
Categorized in कासा