परराष्ट्र मन्त्रालयया इनाप
लहानान्युज | गुंलाथ्व अष्टमी ११४१, साउन ३२ सोमबाः
![](https://www.lahananews.com/sites/default/files/paras_0.jpg)
नेपाल सरकारं अफगानिस्तानय् दुपिं नेपामिपिन्त उद्धार याइगु जूगु दु ।
उकिया नितिं अफगानिस्तानय् दुपिं नेपाःमिया नेपालय् दुपिं छेँजःपिन्त नां टिपे याकेत इनाप याःगु दु । परराष्ट्र मन्त्रालयं आइतवाः सनिलय् विज्ञप्ति पिकनाः अफगानिस्तानय् दुपिं नेपामिपिनिगु धलः मुंकेत कन्सुलर सेवा विभागया वेबसाइटय् अनलाइन रजिष्ट्रेसन पोर्टलया व्यवस्था याःगु धागु दु ।
थ्वहे पोर्टललय् थःगु नांलिसेया विवरण तत्थें दर्ता यायेत मन्त्रालयं सम्बन्धित मनू व इमि छेँजःपिन्त इनाप याःगु दु । उद्धार अले सम्बन्धित स्वापुया नितिं भाइबर व ह्वाट्स एप सुविधालिसेया मोबाइल नम्बरत ९७४९३२६४५८ अले ९७४९३२६४५९ ब्यूगु दु ।
अफगानिस्तानय् न्ह्यानाच्वंगु लिपांगु घटनाक्रम अले अवस्थाया विषयलय् न्हू दिल्लीस्थित नेपाली नियोगपाखें ट्राभल एड््भाइजरी जारी यायेधुंकूगु न मन्त्रालयं धागु दु । ुअफगानिस्तानय् वैदेशिक रोजगारीया नितिं छ्वःगु म्यानपावर कम्पनीतय्सं अन ज्या यानाच्वंपिं नेपामिपिनिगु विवरण अले उद्धार ज्याया नितिं सेल्लागु सूचं व धलः थत्थें चूलाकेत मन्त्रालयं इनाप याःगु दु ।
काबुलस्थित थीथी देय्या कूटनीतिक नियोग अले अन्तर्राष्ट्रिय संघ संस्थाय् ज्या यानाच्वंपिं नेपामिपिन्त थत्थें उद्धार यानाः सुरक्षित थासय् तयेयंकेत अले स्वदेश लितसःतेत सरकारं मित्र राष्ट्रत मध्ये संयुक्त राज्य अमेरिका, संयुक्त अधिराज्य बेलायत, क्यानडा, जर्मनी, युरोपियन युनियन, जापान अले संयुक्त राष्ट्र संघया ज्याकूतय्त औपचारिक रुपं पौ च्वयाः इनाप याःगु दु ।
Categorized in राष्ट्रिय