पत्रकार प्रजीत शाक्यात उत्कृष्ट खेल पत्रकारिता सिरपाः
लहनान्युज | तछलागा तृतीया ११३८ ( जुलाई १ २०१८ )
![](https://www.lahananews.com/sites/default/files/prajeet.jpg)
शहीद दशरथ चन्द मेमोरियल ट्रष्टं नेवाः पत्रकार राष्ट्रिय दबू, येँ शाखाया छ्याञ्जेलिसें गोरखापत्र राष्टिय न्हिपौया खेल पत्रकार प्रजीत शाक्यात उत्कृष्ट खेल पत्रकारिता सिरपाः लःल्हाःगु दु ।
ट्रष्टं थुगु दँय् बांलाःगु च्वसुयात मूल्याङ्कन यासें उत्कृष्ट पत्रकारिता पुरस्कारया शुरुवात याःगु खः ।
थौं छगू ज्याझ्वःया दथुइ युवा तथा खेलकुद मन्त्री जगतबहादुर सुनार विश्वकर्मां हनापौलिसें ५,००१ तका दां लःल्हानादीगु खः ।
अथे हे क्रिकेटर सन्दीप लामिछानेनाप च्याम्ह कासामीपिन्त दशरथ चन्द मेधावी खेलाडी प्रतिभा पुरस्कार लःल्हाःगु दु ।
शहीद दशरथ चन्दया ११६क्वःगु बुदिंया लसताय् राष्ट्रिय खेलकुद परिषद् (राखेप), त्रिपुरेश्वरय् शहीद चन्दया सालिक न्ह्यःने उगु ज्याभ्mवः जूगु खः ।
सन्दीप विशिष्ट मेधावी कासामि जूगु दुसा पूर्वाञ्चलपाखें ब्याड्मिन्टनया जेसिका गुरुङ, पश्चिमाञ्चलपाखे क्रिकेटया करण के.सी., मध्यमाञ्चलपाखे शारिरीक सुगठनया ननिता महर्जन, मध्यपश्चिमाञ्चलपाखे ह्याण्डबलया कल्पना व सुदूरपश्चिमाञ्चलपाखे ब्याड्मिन्टनया दिपेश धामीयात सिरपाः लःल्हाःगु खः ।
अथेतुं पारामाय् ह्विलचेयर क्रिकेटया हिमाल अर्याल व पारा तेक्वान्दोया रञ्जना धामीयात नं सिरपाः लःल्हात । ट्रष्टं २०६२ सालनिसें कासामितय्त सिरपाः लःल्हाना वयाच्वंगु खः ।
सम्मानित जूपिं कासामित मध्ये नं दिपेशयात सर्वश्रेष्ठ कासामि घोषित जुल । वय्कःयात हनापौलिसें १५,००१ तका दां लःल्हाःगु खः । मेमेपिं कासामिपिन्त म्हतिं १०,००१ तका दां लःल्हाःगु खः ।