न्ह्यथेजाःगु अवस्थाय् नं ओलम्पिक जुइगु आइओसीया धापू
कछलाथ्व एकादशी ११४१,जेष्ठ ८ सनिवाः
![](https://www.lahananews.com/sites/default/files/ole.jpg)
अन्तर्राष्ट्रिय ओलम्पिक कमिटीं टोकियो ओलम्पिक न्ह्यथेजाःगु अवस्थाय् नं जुलाई २३ निसें अगष्ट ६ तक्क न्ह्याइगु धाःगु दु ।
भर्चुअल बैठकय् आइओसीया शीर्ष पदाधिकारीं टोकियोलय् आपतकालिन घोषणा जूसां तबि नं ओलम्पिक मदिइगु न्ह्यथंगु खः । कोरोना महामारीया हुनिं छदँ दिउगु ओलम्पिक थुगुसी नं रद्द यायेमाःगु धासें जापानी नागरिकपिन्सं विरोध यानावयाच्वंगु दु ।
अथेहे ओलम्पिक जुइत ६३ दिं ल्यंदनिबलय् आइओसीं आः धाःसा क्वछिनातःगु ईलय् हे प्रतियोगिता यायेगु न्ह्यथंगु खः । जापानय् मेडिकल विशेषज्ञं नं कोरोना महामारीया हुनिं स्वास्थ्य व्यवस्थाया व्यवस्थापन यायेत थाकुइगु धाःगु दु । तर आइओसीं स्वन्हूयंकया भर्चुअल बैठकं न्ह्यथें जाःगु अवस्था वःसां नं ओलम्पिक याना हे त्वतेगु धिना काःगु खः ।
जापानया ७०गू प्रतिशत जनतां थ्वः प्रतियोगिता रद्द जुइमाःगु धापू तयाच्वंगु दु । टोकियोय् आपतकालिनया उजं बिउसां उकियात सुरक्षित कथं कथेयाना क्वचायेकेगु धैगु योजना यानाच्वंगु व उगु हे कथं प्रतियोगिता यायेगु आइओसीया न्वकू जोन कोयट्सं धयादिल ।
Categorized in कासा