नेवाः एफएमपाखें ५२ गु नेवाः संचारगृहयात हनीगु
नृपेन्द्रलाल श्रेष्ठ | कछलाथ्व सप्तमी ११३८ (नोभेम्वर १४ २०१८)
नेवाः एफ एम १०६.६ पाखें आ वइगु शनिवाः मंसीर १ गते किपुलिइ छगू तःजिगु ज्याझ्वःयासें नेपालभाषं संचालन जुयाच्वंगु संचार माध्यम नाप नापं नेपालभाष यात थाय् बियातःगु नापं याना देय् न्यंकंया ५२ गू संचार माध्यमयात हनीगु जूगु दु ।
संवत ११३९ न्हूदँ व नेवाः एफ एम झिंनिदँ फुना झिंस्वदँ क्यंगु लसताय् वाडमय शताब्दी पुरुष सत्यमोहन जोशीया मूपाहांसुइ किपूया लाय्कुलिइ जुइगु ज्याझ्वलय् अथे संचार माध्यमयात हनेत्यंगु खः ।
समावेशी संचारया बहस जुयाच्वंगु इलय् भाषिक समावेशी नं संचार माध्यमय् यायेमाःगु खँयात बः बिइगु कथं अथे नेवाः भासं संचालन यानाच्वंगु व नेवाः भाय्यात थाय् बिया वयाच्वंगु संचारगृहयात हनेत्यनागु खः धकाः नेवाः एफ एमया प्रबन्ध निर्देशक श्रीकृष्ण महर्जनं लहनान्युजयात जानकारी बियादीगु दु ।
स्वनिगलं पिहां वयाच्वंगु व स्वनिगलय् संचालन जुयाच्वंगु संचार माध्यम जक मखु स्वनिगलं पिनें पिहां वयाच्वंगु पत्रपत्रिकालिसें स्वनिगलं पिने नं संचालन जुयाच्वंगु संचार माध्यमयात हनेत्यंगु खँ न्ह्यथसें वय्कलं बियादीगु जानकारी कथं थौंकन्हय् पिहां वयाच्वंगु नेपालभाषाया न्हिपौ, वाःपौ, बाछि पौ, लय्पौ, नेपालभाषं संचालन जुयाच्वंगु अनलाईन, टेलिभिजन, एफ एम नापं याना न्यय्गुलिं मल्याक संचार संस्थात हनेत्यंगु दु ।
नेपाल संवतया न्हूदँ नाप नेवाः एफ एमया बुदिंया लसताय् नेवाः संचार ख्यलं याना वयाच्वंगु ज्यायात च्वंगु संचार माध्यमयात लसतां हनेगु जुया थुगु लसता हना ज्याझ्वः याना अथे हनेत्यंगु खः । किपूया लाय्कूया दबुलिइ जुइगु उगु ज्याझ्वलय् नेवाः एफ एम न्यनापि पुचः तकं औपचारिक रुपं घोषणा यायेगु नाप नापं सास्कृतिक ब्वज्या नं जुइ धाःगु दु ।
थौंकन्हय् स्वनिगलं पिने पोखरा, हेटौंडा, काभ्रेपाखें नं पत्रिका पिथानाच्वंगु दुसा स्वनिगलं पिने नं थीथी एफ एमपाखें नेवाः भासं ज्याझ्वः प्रशारण जुयाच्वंगु दु । उकिं देय्न्यंकंया हे संचारगृहया प्रतिनिधियात सःताः हनेत्यंगु खः । नेपाःया संचार जगतय् थुलिमछि नेवाः संचार मध्यमयात हनेत्यंगु थ्व न्हापांखुसि जुइमाः ।
