नेपाल थाइलायन्डलिसे बुत
लहनान्यूज सम्वाददाता | कौलाथ्व त्रयोदशि ११३६ (अक्टोबर १४ २०१६)
![](https://www.lahananews.com/sites/default/files/cricket_5.jpg)
हङकङय् न्ह्यानाच्वंगु मिसा विश्वकप क्रिकेटय् एशियन लागाया ल्यज्या कासाय् थौं नेपाल थाइल्याण्डलिसे १ विकेटं बूगु दु ।
थौं सुथय् क्वचाःगु कासाय् टस त्याकाः न्हापां ब्याटिङ याःगु नेपालं मुक्कं २० ओभर म्हिताः ४ विकेटया क्षतिइ १०८ रन दयेकूगु खः । लिसलय् १०९ रनया विजय आज्जु थाइल्याण्डं ८ बल म्हिते ल्यं दनिबलय् ९ विकेटया क्षतिइ पूवंकाः कासा थःगु ल्हातय् लाकल ।
ब्याटिङया झ्वलय् नेपालया लागिं नेरी थापां अविजित ३२ रन दयेकल सा ईन्दु बर्मां २६ रन अले निर्मला कुमारी शाहीं २० रनया योगदान ब्यूगु खः । आःतक्क नेपालं न्यागू कासा म्हितूगुलिइ निगू कासा त्याकूगु दुसा थौंलिसें स्वंगू कासा बूगु दु ।
थृुगु कासा बूगुलिसें नेपालया मेगु झ्वलय् दुहांवनेगु सम्भावना नं फूगु दु । आः नेपालं चीनलिसे छगू कासा म्हिते जक ल्यं दनि ।
प्यंगू टोली दुथ्याःगु कासाय् दक्वं टोलीं थवंथवय् निगू निगू कासा म्हितेमाः । आःतक्क ५ कासा म्हितूगु थाइल्याण्ड ल्याः धलखय् ८ ल्याःलिसें शीर्ष थासय् दुसा ४÷४ ल्याः दयेकूगु हङकङ व नेपाल छसिकथं निगूगु व स्वंगूगु थासय् दु ।
Categorized in कासा