नेपाली हिन्दु मिसातय् तःजिगु नखः हरितालिका तीज थौंनिसें न्ह्यात
ञंलाथ्व द्धितीया ११४१, भाद्र २३ बुधवाः
नेपाली हिन्दु मिसातय् तःजिगु नखः हरितालिका तीज थौंनिसें न्ह्याःगु दु ।
तीजया छन्हु न्ह्यः दर नयेगु चलन कथं थौं हिन्दु मिसातय् थःछेँ, थःथिति व पासापिंलिसे मुनाः साःसाःगु नसा ज्वलंलिसें दर नयेगु याइ । दर नयाः कन्हय्कुन्हु निराहार अपसं च्वनाः हरितालिका तीज हनेगु याइ ।
धार्मिक मान्यता कथं सत्ययुगयष्् पार्वतीं नं भाद्र शुक्ल द्वितीयाया दिनय् दर नयाः तृतीयाया दिनय् अपसं च्वंगु किंवदन्ती दु । इहिपाः मजूनिपिं मिसातय् महाखः थुज्वःम्ह भाःत लाय्मा धकाः इहिपा जूपिनि थः भाःतया ताःआयूया कामना यासें अपसं च्वनेगु चलन दु । सरकारं निषेधाज्ञा चीकूगुलिं गां शहरय् दक्वभनं तीजया चहलपहल अप्वःगु दु ।
उखे पशुपतिनाथ देगः वइगु असोज १ गतेनिसें पूवंक चालीगु जूगु दु । कोरोना महामारीया हुनिं बन्द जूगु पशुपतिनाथ देगः चायेकेगु निर्णय जूगु पशुपति क्षेत्र विकास कोषया सदस्य सचिव मिलनकुमार थापां जानकारी बियादिल ।
सदस्य सचिव थापायाकथं स्वास्थ्य मन्त्रालयं क्वःछ्यूगु स्वास्थ्य मापदण्ड कथं हे दर्शनया लागिं देगः चायेकेगु निर्णय जूगु खः । असोज १ गतेनिसें हे पशुपतिइ विशेष पूजा नं न्ह्याइ । दर्शनार्थीं क्वःज्यूकथं धेबा पुलाः विशेष पूजा यायेखनी ।
आःतक्क पशुपतिनाथय् नित्य पूजा जक जुयावःगु दु । कोरोनाया निगूगु लहर न्ह्यायेधुंकाः वंगु वैशाख १६ गतेनिसें सर्वसाधारणया लागिं बन्द याःगु खः । पशुपतिनाथया मूल देगःलिसें देवालय शिवालय अले गुह्येश्वरीलिसें शक्तिपीठ भक्तजनया लागिं बन्द याःगु खः ।
असोज १ गतेनिसें भौतिक दूरी कायम यानाः स्वास्थ्य सुरक्षा मापदण्ड लिनाः पशुपति क्षेत्र चालीगु कोषं न्ह्यथंगु दु । २०७६ चैतय् कोरोना महामारी नेपालय् नं खनेदयेधुंकाः पशुपतिनाथ देगः भक्तजनया लागिं बन्द याःगु खः ।
१० ला लिपा २०७७ पुस १ गतेनिसें भक्तजनया लागिं देगः खुला याःगु खः ।
Categorized in राष्ट्रिय
