नेपाली फुटबल टोली इराक भ्रमणय्
कछलाथ्व चतुर्दशी ११४१,जेष्ठ ११ मंगलवाः
![](https://www.lahananews.com/sites/default/files/footbal.jpg)
नेपाली राष्ट्रिय फुटबल टोली थौं इराक वनेत्यंगु दु । इराकलिसेया मैत्रीपूर्ण कासालिसें फिफा विश्वकप ल्यज्याया लागिं नेपाली टिम थौं बहनी इराक वनेत्यंगु खः ।
फिफाया ग्वाहालिइ कतार एयरवेजया चार्टड बिमानं नेपाली टिम इराक वनेत्यंगु खः । वइगु शनिबाः जुइगु मैत्रीपूर्ण कासाया लागिं नेपाली टिम इराक वनेत्यंगु खः । इराकलिसेया मैत्रीपूर्ण कासा धुंकाः नेपाली टिम आइतबाः कुवेत वनी ।
थुगु टुरया लागिं वनेत्यंगु टिमया २३ कासामि व १२ अफिसियलया कोरोना रिपोर्ट नेगेटिभ वःगु दु । नेपालं इराक लिसेया मैत्रीपूर्ण कासा धुंकाः फिफा विश्वकप ल्यज्या म्हिती । गुकी नेपालं थ्व हे जेठ २० गते चाइनीज ताइपेइलिसे, जेठ २५ गते जोर्डन व जेठ २८ गते अष्ट्रेलियालिसे ल्यज्या कासा म्हिती ।
विश्वकप ल्यज्याय् नेपालं आःतक्क न्यागू कासा म्हितूगुलिइ छगुलिइ त्याःगु दुसा मेगु प्यंगू बूगु दु । नेपालया विश्वकप ल्यज्याया मेगु चरणय् वनेगु सम्भावना तसकं म्ह्वः जूगुलिं नं प्रशिक्षक अब्दुल्लाहं ल्याय्म्ह कासामियात एक्सपोजर बीगु ह्वःताः ब्यूगु खः । थुगुसीया टिमय् ल्याय्म्ह कासामिइ ए डिभिजन मम्हितूपिं कासामिं नं ह्वःताः चूलाकूगु दु ।