नेपालय् थौंनिसें अन्तर्राष्ट्रिय लगानी सम्मेलन
लहनान्यूज | चिल्लाथ्व चतुर्थी ११३७ (मार्च २ २०१७)
नेपालय् थौंनिसें अन्तर्राष्ट्रिय लगानी सम्मेलन जुइत्यंगु दु ।
नेपालया आर्थिक विकासया मेरुदण्ड नालातःगु ९ ख्यलय् केन्द्रित जुयाः थुगु सम्मेलन यायेत्यंगु खः । वैदेशिक लगानी दुकायेत धासें उद्योग मन्त्रालय व लगानी बोर्डया मंकाः ग्वसालय् सम्मेलन जुइत्यंगु खः ।
सम्मेलनय् २५ देय्या २सःत्या विदेशी अले झण्डै ३सः स्वदेशी लगानीकर्तां ब्वति कायेत्यंगु दु । सम्मेलनय् थीथी ख्यलय् करीब १ खर्ब तकाया लगानी प्रतिबद्धता वइगु मन्त्रालयया अनुमान दु ।
सम्मेलनय् दक्कले आपाः चीनपाखें ८९ कम्पनीया प्रतिनिधिपिनिगु ब्वति दु । अथे हे भारतया २१, श्रीलंकाया २०, मलेसियाया १४, जापानया १३, क्यानाडाया १२, हंगकङया १०, बेलायत, दक्षिण कोरिया व भियतनामया ८, रुसया ७ व अमेरिकाया ६ कम्पनीया प्रतिनिधिपिनिगु ब्वति दइगु जूगु दु ।
सम्मेलनय् ऊर्जा, पूर्वाधार, पर्यटन, सूचना प्रविधि, वित्तीय क्षेत्र, खानी अले खनिज, कृषि अले वनजन्य उत्पादन लिसेंया ख्यःलिसे सम्बन्धित विषयस ज्यापौ न्ह्यब्वइगु ज्याझ्वः दु । नेपालय् निक्वःगु खुसी अन्तर्राष्ट्रिय लगानी सम्मेलन जुइत्यंगु खः ।
Categorized in राष्ट्रिय
