नेपालं युएई व पपुवा न्युगिनीलिसे त्रिकोणात्मक श्रृंखला म्हितिइगु
सिल्लाथ्व सप्तमी ११४२, माघ २५ मंगलवाः
![](https://www.lahananews.com/sites/default/files/cricket_12.jpg)
नेपालं युनाइटेड अरव इमिरेट्स (युएई) व पपुवा न्युगिनीलिसे आइसिसी क्रिकेट विश्वकप लिग–२ अन्तर्गत त्रिकोणात्मक एक दिवसिय श्रृंखला म्हितिइगु जूगु दु ।
युएईं थ्वहे मार्च ३गूगु वालय् नेपाः व पपुवा न्युगिनीलिसे त्रिकोणात्क श्रृंखला ग्वसाःग्वयेत्यंगु खः । श्रृंखलाया विस्तृत कासा धलः सार्वजनिक जुइत ल्यं दनिसां मार्च १५ निसें २२ तक्क शारजाह क्रिकेट रंगशालाय् कासात जुइत्यंगु दु ।
नेपालं आइसिसी विश्वकप लिग–२ लय् आःतक्क निगू त्रिकोणात्मक श्रृंखला म्हितूगु दु । नेपालं २०२० य् येँय् ओमान व अमेरिकालिसे म्हितुगु खःसा वंगु असोजय् ओमानय् ओमान व अमेरिकालिसे म्हितुगु खः ।
नेपाल आइसिसी विश्वकप लिग–२ लय् ८ गू कासां ८गू ल्याः लिसें ६गूगु थासय् दु् । २०२३ तक्क न्ह्याइगु विश्वकप लिग–२ या शीर्ष ३गू टोलीं तप्यंक एकदिवसिय विश्वकप छनोटय् थाय् दयेकिइ । ल्यं दूगु ४गू टोलीं प्लेअफ म्हितेमालिइ ।
आः तक्क ओमान २२ गू कासाय् २९गू ल्याः मुना शीर्ष थासय् दु् । १२गू कासां १६गू ल्याः मुंकुगु स्कटल्यान्ड निगूगु थासय् दुबलय् १६गू कासां १४गू ल्याः मुंकुगु अमेरिका ३गूगु थासय् दु ।
युएई ११ ल्याः लिसें ४गूगु वग नामिबिया १०गू ल्याः लिसें ५गूगु थासय् दु । नेपाःया ८ गू ल्याः दुबलय् दक्वःलय् लिउने दूगु टोली पपुवा न्युगिनीं ल्याः मुनेफूगु मदुनि ।
Categorized in कासा