नेपाः एसिसी यू–१९ इस्टर्न रिजन क्रिकेट च्याम्पियन
लहनान्यूज | ने.सं. ११३९ दिल्लाथ्व सप्तमि (९ जुलाइ, २०१९), मंगलवाः
![](https://www.lahananews.com/sites/default/files/D_APSvZVUAAs24g.jpg)
नेपाः एसिसी यू–१९ इस्टर्न रिजन क्रिकेट च्याम्पियन जूगु दु ।थौं मंगलवाः मलेसियाय् उपाधिया नितिं जूगु धेंधेंबल्लाय् हङकङयात ६गू विकेटं बुकूसें नेपालं उपाधि रक्षा याःगु खः । थ्व स्वयां न्ह्यः नेपालं निदँ न्ह्यः जूगु कासाया नं उपाधि त्याकूगु खः ।
हङकङं ब्यूगु ९६गू रनया सामान्य लक्ष्य नेपालं १६गू फुति १गू ओभरय् ४गू विकेटया खतिइ पार याःगु खः । नेपाःया ओपनर रीत गौतमं १३गू रन व पवन सर्राफं ३९गू रन दयेकूगु खः । रीतं १४गू बलय् २गू चौका व पवनं ३६गू बलय् ५गू चौका व १गू छक्का थ्वाःगु खः ।
खडक बहादुर बोहरां २२गू बलय् ८गू रन व कप्तान रोहितकुमार पौडेल १०गू बलय् १२गू रन दयेकाः आउट जुल । भीम सार्कीं नटआउट ८गू रन दयेकल । बलिङय् हङकङया रौनक कपुरं २गू विकेट काःगु खः ।
थ्व स्वयां न्ह्यः मलेसियाया किनरारा ओभलय् टस त्याकूगु नेपालं फिल्डिङ ल्ययेवं न्हापां ब्याटिङ याःगु हङकङ ४३गू फुति १गू ओभरय् ९५गू रनय् फुक्क आउट जूगु खः ।
हङकङया इनिङ ध्वस्त यायेत नेपाःया सागर ढकालं घातक बलिङ याःगु खः । वय्कलं ५गू विकेट काल । किफायती बलिङ याःम्ह ढकालं १०गू ओभरय् १८गू रन जक बिल । सागरं ५गू ओभर मेडन तःगु खः ।
अथे हे, कमलसिंह ऐरीं ३गू विकेट काल । कमलं ८गू ओभरय् २गू मेडन तसें २३गू रन बिल । कुशल मल्ल व तिलकराज भण्डारीं १/१गू विकेट काल । कुशलं ८गू फुति १गू ओभरय् ५गू मेडन तयाः ४गू रन जक ब्यूगु खः ।
मेखे हङकङया नितिं अदित गोरावारां दकलय् अप्वः २४गू रन दयेकल । वय्कलं ७१गू बलय् ४गू चौका थ्वाःगु खः । अथे हे, कुल्हान मार्क काल्लुं १९गू रन दयेकूगु खः ।
उपाधि त्याकेधुंकाः नेपाः वइगु अगष्टया अन्तिमय् श्रीलंकाय् जुइगु यू–१९ एशिया कपया नितिं छनोट जूगु दु ।एशिया कपय् ग्वसाः देय् श्रीलंकालिसें अफगानिस्तान, बंगलादेश, भारत, पाकिस्तान व युनाइटेड अरब इमिरेट्सं म्हितीगु पक्का जुइधुंकूगु दु ।
Categorized in कासा