नेपाःया व्यापारीपिनिगु विदेशय् लगानी दूगु खुलासा
ञलागा द्वादशी ११४१, असोज १८ सोमबाः
कर व्यवस्था अःपूगु देशय् कम्पनी चायेकाः अपारदर्शी ढंगं आर्थिक कारोबार याःपिं मध्ये नेपाःया प्रतिष्ठित औद्योगिक घराना दुथ्याःगु दाबी याःगु दु ।
गैरकानूनी रूपय् कमे यानातःगु धन सुचुकेत अःपुइगु धयातःगु देशय् थःथःगु नामय् कम्पनी चायेकाः गोप्य कथं लगानी, कारोबार व सेयर न्यायेमिइगु ज्याय् म्ह्वोतीं १६म्ह नेपामित तप्यंक्क दुथ्यानाच्वंगु प्यान्डोरा पेपर्सं दाबी याःगु दु ।
खोज पत्रकारतय्गु हलिंन्यंकंया सञ्जाल ‘आई.सी.आई.जे’लिसेया हलिंन्यंकंया १४०म्ह मल्याक सञ्चार माध्यमया सहकार्यया लिधंसाय् ‘प्यान्डोरा पेपर्स’ नां बियाः म्हिगः प्रकाशन याःगु प्रतिवेदनय् १६म्ह नेपामिया नां दुथ्याः ।
नेपाःया निगू तःधंपिं व्यापारिक घराना – चौधरी ग्रुप व गोल्छा अर्गनाइजेसनय् दुथ्याःपिं मनूतय्गु अन्यागु लगानी दुगु पान्डोरा पेपर्सं दाबी याःगु दु । खोज पत्रकारिता केन्द्र, खोपकें नेपाःयात चूलाकूगु भ्वँ कथं नेपाःया अर्बपति सांसद विनोद चौधरी व वय्कया छेँजलं ब्रिटिश भर्जिन आइल्याण्डय् कम्पनी चायेकाः थीथी देशय् कारोबार यानाच्वंगु दु ।
अथेहे अफसोर कम्पनी चायेकाः कारोबार याःपिं मध्ये नेपाःया मेगु तःधंगु व्यापारिक घराना गोल्छा अर्गनाइजेसन खः । अथेहे अजयराज सुमार्गी, अर्जुनप्रसाद शर्मा व किशोर राणाया तकं लगानी दु ।
थ्व बाहेक यलया पुल्चोकय्च्वंम्ह राजेन्द्र शाक्य व मेमेपिं नेपामि मध्ये सुदराज घिमिरे, पुरुषोत्तम पौड्याल, येँ ज्ञानेश्वरया सुधीर मित्तल, नेपालय् व्यवसाय याइम्ह भारतीय नागरिक राधेश्याम सराफं न ट्याक्स हेभन देशय् कम्पनी चायेकातःगु दु ।
Categorized in राष्ट्रिय
