निशुल्क एम्बुलेन्सपाखें आःतक्क सत्या स्वयां आपाःसिन सेवा काल
बिराजकाजी राजोपाध्याय | चौलागा एकादशी ११४०
![](https://www.lahananews.com/sites/default/files/ambulance-vehicle-2.jpg)
येँ महानगरपालिकाया आर्थिक ग्वाहालिं न्ह्यानाच्वंगु निःशुल्क एम्बुलेन्स सेवां लकडाउनया इलय् नुगः ल्वय्, जँलास्ये ल्वगि लिसेंया विरामीयात प्रभावकारी सेवा बीधुंकूगु दु ।
एम्बुलेन्स चालक संघ, नेपाल (येँ जिल्ला कार्य समिति)या नायः गणेश सापकोटां सेवा न्ह्याकागु ६न्हुं हे सत्या स्वयां आपाःसित सेवा बीधुनागु जानकारी बियादिल ।
‘मुख्य यानाः डायलोसिस यायेमाःपिं विरामी, नुगः ल्वगि, मचा बुइत व्यथा जूपिं लिसेंया विरामीयात प्राथमिकताय् तयाः न्यागः एम्बुलेन्सं थौं तक्क स्वसःक्वः स्वयां अप्वः सेवा बीधुन,’ सापकोटां धयादिल ‘मनू ल्याःखायेबलय् सत्या स्वयां आपाःसित सेवा बिया । वय्कःपिन्त छेँ वा डेरां अस्पताल व वासः यायेधुंकाः अस्पतालं हाकनं छेँय् वा डेराय् थ्यंकाबीगु याना ।’
मेगु दिनय् स्वयां शनिबाः सेवा काइपिनि ल्याः म्ह्वः दुगु धासें मेगु दिनय धाःसा न्हियान्हिथं सेवा काइपिं अप्वयाच्वंगु जानकारी बियादिल ।
सापकोटां सम्झौता कथं कार्यक्षेत्र महानगरपालिका दुने जक जूसां महानगरपालिका क्षेत्र पिने व स्वनिगः पिनं नं विरामीतय्सं स्वापू तयाच्वंगु दुगु धासें अज्याःगु फोन न्हिं ५० स्वयां आपाःया ल्याखय् वयेगु याःगु जानकारी बियादिल ।
महानगरपालिकाया आर्थिक ग्वाहालिइ न्ह्यानाच्वंगु न्यागः एम्बुलेन्सं मुख्य यानाः महानगरपालिका क्षेत्र दुनेया विरामीयात आपाः प्राथमिकता बीगु याः । चक्रपथ पिने निगू किलोमिटरतक्कया विरामीयात तकं वीर अस्पताल, टिचिङ अस्पताल, बालाजुया डायलोसिस सेन्टर लिसेंया थासय् तक्क यंकाबीगु व छेँय् वा कोथाये तयाबीगु यानाच्वनागु वय्कःया धापू दु ।
येँ महानगरपालिका प्रमुख बिद्यासुन्दर शाक्यं लकडाउनया इलय् हृदयघात, जँलास्येँ ल्वगि लिसेंयापिं महानगरबासीतयत निशुल्क एम्बुलेन्स सेवा बीगु आज्जुं लकडाउन ई ज्वःछि २४घौ हे सेवा बीगु व्यवस्था ताःलाकागु जानकारी बियादिल ।
‘थःगु निवासं अस्पतालतक्क, छगू अस्पतालनिसें मेगु अस्पतालतक्क वा अस्पतालं बिरामीया छेँ वा कोथातक्क यंकेत निःशुल्क एम्बुलेन्स सेवाया सुविधा उपलब्ध दु’ प्रमुख शाक्यं धयादिल, ‘लकडाउनया इलय् सार्वजनिक यातायात नं उपलब्ध मदुगु अवस्थाय् महानगरय् च्वनाच्वंपिं विरामीयात अस्पतालतक्क यंकेत हयेत समस्या जूसा येँ महानगरपालिकां हटलाइन नम्वर ११८०इ स्वापू तयेत इनाप यानाच्वना ।’
आः न्यागः एम्बुलेन्सं चाबही, बौद्ध, बालाजु, स्वयम्भू, लाजिम्पाट, अन्तराष्ट्रिय विमानस्थल, कोटेश्वर लिसेंया थासं एम्बुलेन्सं सेवा बियाच्वंगु दु ।
येँ महानगरपालिकां कोरोना संक्रमणया सम्भावना दुपिं विरामी अस्पतालतक्क यंकेत समस्या जूसा उमित सेवा बीत धासें येँ महानगरपालिकाया हे सहकार्यय् न्ह्यानाच्वंगु नेपाल एम्बुलेन्स सेवायात थ्वयां न्ह्यः हे तयारी अवस्थातय् तःगु दु । उगु सेवा कायेत १०२ स स्वापू तयेफइगु नं प्रमुख शाक्यं जानकारी बियादिल ।
Categorized in राष्ट्रिय