निःशुल्क मिखा शिविर व मिखादान ज्याझ्वः
नृपेन्द्रलाल श्रेष्ठ | सिल्लागा पंचमी ११३८ (फ्रेअवरी ३० २०१८)
ताम्रकार समाजया स्वास्थ्य उपसमितिया ग्वसालय् निःशुल्क मिखाया शिविर व मिखादान ज्याझ्वः जुल । नेपाल आँखा अस्पतालया सहकार्यस जूगु उगु ज्याझ्वलय् थ्यंमथ्यं निसःम्ह स्थानीयबासीपिनिगु मिखाया परीक्षण याय्गु ज्या जूगु खः । अथेहे उगु शिविरपाखें झिंस्वम्ह मोतियाविन्दुया समस्या दुगु नं पहिचान जूगु खः ।
ज्याझ्वलय् नेपाल आँखा अस्पतालया डा. इन्दु प्रसाद ढुङ्गेल, ताम्रकार समाजया नायः रविन्द्र ताम्रकार, आँखा दान समाजया नायः जगन्नाथ महर्जनं शिविर व मिखादानयात कयाः न्ववानादीगु खः । ज्याझ्वलय् पीम्हेस्यां मिखादान याःगु खः ।
![](http://www.lahananews.com/sites/default/files/pictures/IMG_9999.jpg)
अथे हे थ्व स्वयां न्ह्यः जूगु मिखादान सम्बन्धि अभिमुखीकरण ज्याझ्वलय् समाजया नायः रविन्द्रराज ताम्रकार, आँखादान समाजया मूछ्याञ्जे साधुराम महर्जन, समाजसेवी मोतिशान्ति शाक्य, उपसमितिया संयोजक मिला ताम्रकार, दुजः रिद्धि ताम्रकारपिन्सं मिखादानया आवश्यकता व महत्वयात कयाः न्ववानादीगु खः ।
उगु ज्याझ्वलय् नेपाल आँखा बैंकपाखें ऐजन राजभण्डारीं मिखादानया डकुमेन्ट्री न्ह्यब्वयादीगु खः ।