नामिबियायात बुका पाकिस्तान टी–ट्वेन्टी विश्वकपया सेमिफाइनलय्
कौलागा द्धादशी ११४१, कार्तिक १६ मंगलवाः
![](https://www.lahananews.com/sites/default/files/pak_3.jpg)
नामिबियायात बुका पाकिस्तान विश्वकप टि–ट्वेन्टी क्रिकेटया सेमिफाइनलय् थ्यंगु दु ।
अबुधाबीइ वंगु चान्हय् जूगु कासाय् पाकिस्तानं नामिबियायात ४५गू रनं बुकल । कासाय् टस त्याका न्हापा व्याटिङ याःगु पाकिस्तानं २०गू ओभरय् २ गू विकेट तंका सच्छि व ८९ गू रन दयेकल ।
उमिगु नितिं मोहोमद रिजवानं अविजित ७९गू रन व बाबर आजमं ७०गू रन दयेकल । लिसःलय् सच्छि व ९०गू रनया आज्जु लिफ्यागु नामिबियां २०गू ओभरय् ५गू विकेट तंका सच्छि व ४४गू रन दयेकुगु खः ।
मदिक्क ४गूगु जित लिसें पाकिस्तान विश्वकपया सेमिफाइनलय् थ्यंगु दु । म्हिगः हे जूगु मेगु कासाय् बंगलादेशयात ६गू विकेटं बुका दक्षिण अफ्रिकां नं सेमिफाइनल थ्यनेगु संभावना क्वात्तुकुगु दु ।
पुचः ए लय् ४ गु कासां ८गू ल्याः मुंकुगु इंग्ल्याण्ड शिर्ष थासय् दूबलय् उतिग्यंक कासां ६ गू ल्याः मुंकुगु दक्षिण अफ्रिका निगूगु थासय् दु । छगू कासा म्हो म्हितुगु अष्ट्रेलिया ४गू ल्याः लिसें ३गूगु थासय् दु ।
विश्वकप टी–ट्वेन्टी क्रिकेटय् थौं नं निगू कासा जुइ । थौंया न्हापांगु कासाय् न्युजिल्याण्ड व स्कटल्याण्ड म्हितिइबलय् निगूगु कासाय् भारतं अफगानिस्तानलिसे म्हितिइ । मदिक्क निगू कासा बूगु भारत दबाबय् दु ।
Categorized in कासा