येँ महानगरपालिकाया आर्थिक विधेयक ०७८ पारित जूगु दु ।

राष्ट्रिय सभागृहस् च्वंगु गुक्वःगु अधिवेशन अन्तर्गत न्याक्वःगु मुँज्याय् प्रस्तावित जूगु राजस्वया दरया विषयस सहलह याना उगु विधेयक पारित याःगु खः । कोरोना महामारीं उद्योग, वाणिज्य लागा लिसें सामान्य जनजीवनय् तक्कं लिच्वः लाःगु विश्लेषण याना म्होतिं २०गू प्रतिशतनिसें ९०गू प्रतिशत तक्क छुट विइगु निणर्य याःगु खः ।

उगु भ्mवलय् मुँज्याया नायः लिसें महानगर प्रमुख विद्यासुन्दर शाक्यं धयादिल, “महामारीया स्याःचाः फयाच्वंगु आर्थिक लागायात थकायेत राजस्वया दर यथावत तया दायरा अप्वेकिगु नीति कथं जिमिसं थ्वः निणर्य यानागु खः ।” थ्वयान्ह्यः असार ३ गते पेश जूगु आ.व. ०७८/०७९ या वार्षिक नीति लिसें ज्याभ्mवलय् सहलह लिपा असार ६ गते च्वंगु स्वंगूगु मुँज्यां पारित याःगु खः ।

अथेहे असार १० गतेया प्यक्वखुसीया सभाय् आ.व. ०७८/०७९ या महानगर प्रमुख विद्यासुन्दर शाक्यं “येँ महानगरपालिकाया आर्थिक विधेयक, २०७८” प्रस्ताव यानादिगु खः । उगु हे मुँज्याय् उपप्रमुख हरिप्रभा खड्गी श्रेष्ठं आ.व. ०७८/०७९ या लागि १८गू अर्ब ९५ क्वति ७७ लखः १२द्वःया बजेट व विनियोजन विधेयक ०७८ पेश यानादिगु खः ।

आ.व. ०७८/०७९ या लागि आन्तरिक आयपाखे ४गू अर्ब ३४ क्वति ३२ लखः ध्येबाया आज्जू तःगु खः । थौं जूगु आर्थिक विधेयकया सहलहस नगरसभा दुजः मचाराजा महर्जन, आनन्द गौतम, जीवन डंगोल, कृष्णमणि भट्टराई, नरेशमान महर्जन व आशा श्रेष्ठ रौनियारं थःथःगु न्वचु तःगु खः । थौंया मुँज्याय् लेखा समितिया संयोजक धु्रवप्रसाद त्रिपाठीं लेखा समितिया प्रतिवेदन पेश यानादिगु खः । सहलह धुंका मुँज्यां प्रतिवेदन पारित न जूगु दु । नगरसभाया ६क्वःगु मुँज्या असार २५ गते च्वनिगु जूगु दु । उगु मुँज्याय् विनियोजन विधेयकय् सहलह जुई ।

Categorized in राष्ट्रिय