धोनीं अन्तर्राष्ट्रिय क्रिकेटंय् सन्यास
लहनान्युज | गुंलागा ११ ११४०,साउन ३१ शनिवाः
![](https://www.lahananews.com/sites/default/files/ms.jpg)
भारतीय क्रिकेटर महेन्द्रसिंह धोनीं अन्तर्राष्ट्रिय क्रिकेटपाखे सन्यास कायेगु घोषणा याःगु दु । भारतीय क्रिकेट टिमया पूर्वकप्तान तक जुयादिम्ह धोनीं थौं शनिवाः बहनि इन्स्टाग्रामय् छगु पोस्ट यासे अन्तर्राष्ट्रिय क्रिकेटपाखे सन्यास कायेगु घोषणा याःगु दु ।।
भारतीय क्रिकेटय् धोनीयात सफल कप्तानया रुपं कायेगु याः । धोनीया कप्तानीइ भारतं सन् २००७ य् ट्वान्टी–२० विश्वकप, सन् २०११ य् एकदिवसीय विश्वकप व सन् २०१३ य् आईसीसी च्याम्पियन्स ट्रफी त्याकूगु खः ।
धोनीं लिपागु पटक सन् २०१९ या विश्वकप क्रिकेटय् सेमिफाइनलय् न्युजिल्याण्डया विरुद्धया कासा म्हितिगु खः ।
धोनीं टेस्ट क्रिकेटय् वःगु सन् २०१५ य् हे सन्यासया घोषणा याये धुकुगु खः । धोनीले सन् २००४ य् भारतीय टिमय् डेब्यु याःगु खः । डेब्यु याःगु स्वदँया दुने हे ट्वान्टी–२० टिमया कप्तानी जूगु खः ।
अथेहे इन्डियन प्रिमियर लिगय् धोनीं चेन्नई सुपर किंग्सयात स्वकः तक उपाधि बिउगु खः ।
धोनीं भारतीय टिमया लागि ३५० गु एकदिवसीय म्याच म्हितिगु दु । उक िमध्ये ५० गू औसतं १० हजार ७७३ रन दयेकूगु दु । एकदिवसीय क्रिकेटय् धोनीं झीगु शतक व ७३ गु अर्धशतक थ्वाःगु दु । विकेटकिपरय् रुपय् धोनीं ३२१ गू क्याच याःगु दु । अथेहे १२३ म्हेसित स्टम्प आउट याःगु दु ।
अथेहे धोनीं ट्वान्टी–२० क्रिकेटय् भारतपाखे ९८ गू कासा म्हितिगु दु । ट्वान्टी–२० द्धःछि व ६१७ रन दयेकूगु दु ।
टेस्ट क्रिकेटय् धोनीं ९० गू कासाय् ३८ रन स्वया अप्व औसतं ४ हजार ८७६ रन दयेकूगु दु । टेस्ट क्रिकेटय् धोनीं २५६ गू क्याच याःगु दु सा भने ३८ पटक स्टम्प आउट याःगु दु । ब्याट्सम्यानया रुपय् टेस्ट क्रिकेटय् खुगु शतक व ३३ गु अर्धशतक थ्वाःगु दु ।